Mizote hi thu maia thil inhrilhchhawng thin kan ni a, hei vang hi nge ni upain ‘Unau thawnthu sawi mah a dang’ an ti thin. Kan pi leh puten an thil chhinchhiah leh hriat dan ang ang kha an tu leh fate an hrilh thin a, hei vang hian thawnthu leh thil inhlanchhawn dan pawh a inang lo fo mai.

Hun rei pawh a la ni lo chungin kan milarte phumna leh chetvelna hmunah pawh inhnialna a awm chho deuh reng a. Fiara tui chungchangah khaw pahnih Vaphai leh Farkawn te chuan an khaw ram chhunga awm angin an sawi ve ve a. Lalnu Ropuiliani phumna chungchangah pawh inhnialna awmin Ralvawng nge Denlung ah phum a ni tih inhnialna a awm bawk a. Mary Winchester ‘Zoluti’ an lakletna hmun pawh Sailam nge Serchhip Kawlri tih chungchangah inhnialna a awm bawk.

Tun hnaia inhnialna ngaihven hlawh ber erawh Vanapa thihna chungchangah a ni a. Rabung lam chuan an khaw ram Zawlnghak ah phum a niin an sawi a, an phum ngei a ni tih an nu leh pa, pi leh pu atanga hrilhtu pawh mi eng emaw zat an la dam niin an sawi bawk. Hetih lai hian Hnahlan lam chuan Tuithoh kamah a thlan a awm tih sawiin hei hi history nena chhuizawn pawhin a dik niin an sawi bawk a. Vanapa thih thu ziak hmasa ber, P.Chalkhuma chuan Mizo leh Vai chanchinbu kum 1926 chhuak ah, “Hemi Saithuama Rama Ditlang ah hian Vanapa chu Putar takin a thi,” tiin a ziak a. Vanapa tuchhuan la damte pawhin an pi leh pu atanga thu an inhlanchhawn danah Vanapa chu Tuithoh kamah a thi nia sawiin hmun dang chu an pawm theih loh thu an sawi a ni.

Art & Culture thawktute chuan hmun inchuhte chu tihchian a har avangin department ang chuan khawi nge dik tih hriat a har tih an sawi a. Hmun inchuhte chu scientific proof a awm loh chuan khawi hmun nge dik tih puan mai theih a ni lo niin an sawi.

Mizote hi thil chhinchhiah thlip thlep kan nih loh avangin inhnialna hi awm tur reng pawh a ni a, chutih ruala a tichiang theitu tur ber chu sawrkar a ni. Hmun inchuh chungchang hi sawrkar hian mi thiamte ruaiin tichiang se, a tul angin chei ni ta se chuan Mizo mipui tam takin an tlawh duh ngei ang a, chumai bakah khualzin mi nasa taka a hip dawn avangin kan ram hian a hlawkpui ngei a beiseiawm.