Mizoramah chuan Covid damlo enkawl turin mi tlawmngai te an penchhuak zel a, Mizo zemawi a langchhuak zel a, a la langchhuak zel dawn ni pawhin a lang.

Mizoram sawrkar chuan Covid 19 damlo enkawl tura inpe (volunteer) an pun chhoh zel avangin hemi kawnga hma latu tur a din ta hial a, hriattirna tichhuakin volunteer te in report-na tur a siam a. Hriattheih chinah Zirtawpni thleng khan Covid 19 damlo enkawl tura tlawmngaia inpe hi mi 38 an tling tawh a, a hmaa inpe mahse chhinchhiah loh te nen chuan an thahnem tawh hle tura ngaih a ni.

Health Department thawktute chuan heng mi inpe te hi an hnathawh tur leh an thawhna hmun tur tak tihchian a la ni lo tih sawiin tun dinhmunah chuan an awmna district ah a remchang ang ang an thawk mawp mawp hrih niin an sawi a. Volunteer te chu anmahni inpek dan a zirin leh an thiamna nen an hnathawh tur chu an la ngaihtuah dawn niin an sawi a. Tun dinhmunah chuan district lamah a remchang ang ang an thawh tir tih an sawi a. Tun dinhmunah mi eng ­­zat nge tlawmngai tura inpe an la hriat mai loh thu leh district hrang hrangah mi inpe zat an dilkhawm mek niin an sawi bawk.

Volunteer te hlawh leh lawmman chung changah chuan sawrkar atangin ruahmanna a awm hriat a la ni lo a, chutih laiin hriselna lama thawktu dangte ang bawkin volunteer te hian Pradhan Mantri Garib Kalyan Package hnuaiah insurance an ti ve thei dawn a, hemi chung chang hi Task Group on Insurance chuan an buai-pui mek nia thudawn a ni.

Covid natna hi khawvel la hmelhriat ngai loh a ni a, mithiamte lu pawh a tihai a, fimkhur a ngaih bawk avangin mi tam tak chuan an tihbai a. Covid 19 damlo enkawl chu sawi loh, an enkawlna bul hnaia awm pawh an hreh a ni. Chutih laia Mizoramah erawh chuan natna enkawl tura mi tlawmngai te an penchhuak chu lawmawm a tih thu pa challang tak pakhat chuan a sawi a. "Ram tam takah chuan Covid 19 vei te an thinhrik laiin Mizoramah erawh chuan enkawl tura inpe an awm hial hi a mak ka ti zawk a. Hei hian kan zo zemawi a lantir thar leh niin ka hria a, he natna hian Mizote hi min phuarkhawmin min tanrual thar tir leh se ka duh hle a ni," tiin a sawi bawk.