India rama sakhaw hrang hrangte chuan an hunpui a thlenin mi harsa zawkten an mamawh thawmhnaw leh thil dang an lei theih nan a man tlawma zawrh, ‘discount’ an uar hle a. India ram mipui tam berte hi Hindu sakhaw zuitu an ni a, an hunpui, Diwali leh puja dawnah thawmhnaw leh thil chi hrang hrang discount-in an zuar thin a. India ram hmun hrang hrang mai bakah Mizoram atang ngei pawhin mi thahnem takin an thil zawrhte an lei thin a ni.

Kan hma lawka Kristiante hunpui, Krismas leh kumthar lo thleng tur pual hian Mizoram Consumers Union (MCU) pawhin Mizoram chhunga sumdawng leh dawrkaite chu an thil zawrhte man tlawm zawka hralh turin an ngen a. Tahrik ni 29, October 2022-a MCU Executive Meeting chuan thuchhuah siamin India ramah hian hunpui (festival) a lo thlen dawnin, dawrkai leh sumdawngten an theih ang tawkin mipui nawlpui tan discount lian tham/rûnpui an siam thin tih an sawi a. Hunpui lo thleng tur pual hian Mizoram chhunga dawrkai leh sumdawng zawng zawngte pawh, man man taka an thil zawrhte hralha mipui nawlpuite tan discount tha tak siam ve ngei turin an ngen tih an sawi bawk.

Aizawl khawpuia bazar lian ber, New market-a thawmhnaw dawr neitu pakhat chuan anmahni dawrtu zinga harsa deuh nia an hriat chu a thlawna lo pek maite pawh an nei ve thin tih sawiin an dinhmun a zirin mi tam tak chu an zawrhna aia tlawm fe-a leitirte pawh an nei niin a sawi a. “Hetia mi harsa leh chanhai zawkte ka tanpui hian keimah hi ka lawm zawk a. Kan thawmhnaw pawh hi kan hralh tha zawk mah niin ka hre thin a ni,” a ti ve bawk.

Aizawl khawpuia sumdawnna hmun lar tak, Millennnium Centre-a dawrkar inzawmkhawm pawl. Millennium Centre Dawrkai Association hruaitu pakhat chuan discount rûnpui hi kum khatah vawi hnih vawi thumte an nei thin tih sawiin thla kal ta, October 17-31, 2022 inkar pawh khan an nei tih Zalen a hrilh a. Krismas discount neih leh chungchang chu meeting-in tha a tih chuan an la rel leh dawn niin a sawi bawk.