Natna langchhuak Covid-19 positive ten ni 10 hnuah natna an thehdarh tawh lo tih thuchhuak a awm leh tawh a, tun hnai mai khan positive la ni si te chhuah an ni a, sawrkar lam chuan mipui chi-ai lo turin a ti a, mi tam tak an ralkhel lo thei lo thung. WHO pawhin he hripui lakah hian a ngaihdan a thlak leh tawh a, hei hi tun hnaia positive lai an chhuahtir chhan pawh a ni reng a ni.

He hri leng mek hi a nihna takah chuan kan palzam tan viau ni pawhin a lang a, thalai, hrisel tha pangngai tan chuan a hlauhawm lohna chen pawh a awm ta niin a ngaih theih a, kan state bikah phei chuan thihpui kan la awm loh avangin hian kan ngaizam mai mai ang tih a hlauhthawh thu ZALEN in doctor a biakpawh chuan a sawi. "Thalai hrisel ka nihna avangin ka hlau tawk lo pawh a ni mai thei, mahse, kan In lama kan hmangaih, kan fa, kan tu naupang te te te mai bakah kan rohlu, kan pi leh kan pu, kan nu leh kan pa, taksa chakna hniam tawh tak tak, natna kumhlun nei te dinhmun tur erawh kan ngaihtuah chian a ngai ta khawp mai," a ti. India ramah kum 60 chunglam ten an thihpui nasat thu leh naupang hi hlauhthawnawm zinga an tel rualin thihpui erawh an tam lem lo tih a sawi lang tel thung.

Hrikai kan neih ten an dampui chho zel chu lawmawm a tih rualin, mipui lam engemaw chenah invenna lam kan tih that vang nia a ngaih thu ZALEN a hrilh a, sawrkar enforcement team lam an khauh zarah loh theih lovin kan dan kan zawm a, hei hi kan thatpuiah kan doctor biakpawh hian a ngai a, hei hi kenkawh zel tha a ti a, social distancing kan ti tha lo hi hrikai kan pun zel chuan kan tawrh phahna tur niin a hre bawk.

Doctor hian a mimal ngaihdan sawiin, “Mask kan vuah tha peih vak lo chung hian kan hriatchian loh bulah erawh hlauhthawnna avangin kan vuah tha a, chuvangin tualchhunga kai te pawh hian an kai anih pawhin virus load hi a tlem phah ni hian a lang a, kan dam chak chhan pawh hi hian a lang. Vei leh vei pawh hi awmdun loh a tha, a chhan chu vei theuh theuh pawh virus load san zat a inang lo thei a ni,” tiin a sawi.

Inthlahdah loh chu thil tih makmawhah a ngai a, Covid-19 vei enkawlna tur tam zawk ngaihtuah chu tul tak niin a hria, doctor community lamah pawh hemi chungchang hi hun rei tak atanga sawiho a nih thu thu pawh a sawi lang a, tih puitlin a har lutuk chu pawi a ti a. Kai hi pung chho zel mah se, negative zela positive te an chhuah zel theihna turin inenkawlna hmun tam zawk chu mamawh chhoh zel tur a nih thu a sawi. Mi tin te kan chenpuite kaitu ni lo tura fimkhur chu thil tul berah a ngai. "Kan mi tawn zawng zawng te dinhmun kan hre lo a, chuvangin theih tawpa inven hi kan tih makmawh a ni a, social distancing leh mask vuah hi thlahthlam lo ila, hei hian hri dang lakah min veng tel a, Covid-19 hi kan kai anih pawhin hri dangin min tihbuai loh hian enkawl pawh a awlsam a ni," a ti.