Sik leh sa inthlak chhoh lai takin hripuiin khawvela a nuai a, he hrileng avanga invenna tha ber pakhata ngaih chu tunlaia mi tin maiin kan khawi lo kalna apianga kan hmui leh hnar kan tuamna Face Mask hi a ni. He hmaituamna, tam takin khabe dawmna ang deuha an hman bawk hian he hripui piah lamah hritlang lakah min lo veng tha hle niin a lang a, damdawi dawr lam chuan hritlang damdawi an hralh tlem phah chhanah an ngai, khuh leh khawsik damdawi pawh tiamin.

"Hritlang damdawi hi kumin chu kan pechhuak tam lo khawp mai. Kan hnuaia damdawi zawrh tur rawn la thin ho pawh hi hralh a kal loh thu an rawn sawi thin a, tunlai chu pum damdawi lam hi kan pechhuak hnem," tiin Aizawla damdawi dealer lian tak neitu chuan a sawi.

Hei mai hi a la ni lo a, khuh lam damdawi pawh hralh a kal vak lo a, hei vang hian medicine lam doctor te pawhin hetiang kaihhnawihah hian pantu an nei tlem tih doctor rintlak tak pakhat chuan ZALEN a hrilh. Mask hian boruak atanga hri kan kan hip luh tam tak 'Air born disease' lakah nasa takin min lo hum reng a, hripui laka kan himna tur a nih rualin natna dang lakah pawh min lo veng reng tihna a ni.

ZALEN in a biakrawn doctor chuan, "Hemi chungchang hi doctor ho zingah pawh kan sawiho fo a, hripui laka kan invenna lamah nasa takin hri leng dang lakah thui takin kan him phah a, a lehlam zawng chuan a lawmawm khawp mai. Medicine doctor lam pawhin heng tlang hrileng atanga kan vei theih, khawsik, hritlang, khuh, awmna ang chi pantu hi an nei tlem khawp mai tih an sawi a ni," a ti.

Mitin maiin kan vahchhuah naah mask hi kan vuah deuh zel avangin, a chhuak vak pawhin a chhuak ve lo te hnena an kaidarh theih tlang hri leng lakah thui takin a veng. Nausen leh naupang lam pawhin hetiang lamah hian harsatna kum dang aiin an tawk tlem niin a lang bawk. Veng pakhatah damdawi zuar pakhat pawhin, "Hritlang leh khuh kaihhnawih ang chi damdawi rawn lam hi an tam lo khawp mai, tunlai chho hi kum dangah chuan tlang hrileng tam hun a ni a, a chhan pawh ka hre thiam lo," a ti a, 'Face Mask vang hi ni theiin i ring em?' tia ZALEN zawhna chu, "Eee, a ni ngei ngei ang, a ni thei dawn lutuk," tiin a chhang.

He thu ziah lai thleng hian Mizoram-ah Covid-19 vei an awm leh ta rih lo a, state dang atanga rawn haw an indawt chho zut a, chutihrualin kan la fihlim leh rih. Face Mask hi tun dinhmunah chuan invenna hmanraw tha ber a la ni reng a, doctor te pawhin an ngaihpawimawh a ni. Khawvela hripui leng buaipuitu ram hrang hranga mithiam te hian a damdawi an la hmuchhuak lo a, a hri laka invenna tha hrang hrang sawi erawh a danglam fo thin. Mahse, he Face Mask pawimawh zia hi chu an sawi hmaih ngai lo. "Fimkhur thilah chuan mi hnaiah awm loh leh Face Mask vuah baka invenna tha hi khawvela hian a la hre lo," tiin ZALEN in doctor kan biak chuan a sawi.