Mizoram sawrkarin hripui leng a ziaawm nia a hriat avangin February 2021 atangin inkhawm a phal a, nimin atang khan Seventhday Adventist chuan inkhawm an tan a. Vawiin atang hian kohhran tam ber chuan biak in an hawng tan dawn a, kohhran hrang hrang ten sawrkar dan zawm chunga inkhawm an tum tih an sawi.

Presbyterian kohhran hnarkaitu Officers meeting chuan inkhawm chungchang chu tualchhung kohhran kutah an dah a, kohhran hrang hrangten vawiin atang hian sawrkar dan zawm chunga inkhawm an tum. Presbyterian kohhran hi an inkhawm dan tur a inang lo a, tum thum inkhawm tur te leh tum hnih inkhawm tur te pawh an awm, inkhawm hi sunday school anga kalpui tum an awm laiin thuhril inkhawm anga kalpui tur chu a tam ber an ni.

Presbyterian Church of India, Mizoram Synod thuthmun Mission veng kohhran chuan inkhawm hi tum thum zing dar 10, chhun dar 12 leh chawhnu dar 2 ah te an nei dawn a. Heng hunah te hian Upa bial hrang hrangte a chhawkin an inkhawm dawn a, hei hi February thla chhung atan chauh a ni hrih dawn a. KTP, KPP, Kohhran Hmeichhia leh Naupang chawhnu in khawm te an nei hrih lo ang.

Chanmari Prebyterian kohhran chuan inkhawm hi tum hnih, zing dar 10 leh chhun dar 12-ah te an nei dawn a. Chawhma dar 10 ah hian Upa bial 1-9 leh dar 12-ah Upa bial 10-19 te an inkhawm ang a, chawhnu dar 2 ah fellowship hrang hrangte an inkhawm thung ang.

Aizawl Presbyterian Kohhran Venghlui pawhin inkhawm hi vawi hnih chawhma dar 10-ah leh chhun dar 12-ah te an nei dawn a, chawhnu dar 1:30-ah fellowship hrang hrangte an inkhawm veleh ang.

Republic Veng kohhran chuan tum li inkhawm neih an tum a, Biak Inah vek inkhawm hi kalpui tur niin thuhril inkhawm a ni ang. Dawrpui Kohhran chuan Sunday School kalpui an tum nia thu dawn a ni a, Puitling leh Junior department hnuai zawng an inkhawmho dawn a, pawl dangte chu a hrangin an inkhawm ang a, anni kohhran bik hian tun thla hian chawhnu lam hun hi Kohhran Hmeichhia, Pavalai pawl leh KTP te an inkhawm chhawktir dawn a ni.

Roman Catholic Kohhran chuan inkhawm hi sawrkar kaihhruaina anga kalpui an tum thu Most Revd. Stephen Rotluanga chuan a sawi a, kohhran member a zirin inkhawm pawh tum hnih emaw tum thum thleng pawha kalpui a ngaih theih thu a sawi a, Holy Mass programme anga kalpui a nih tur thu a sawi bawk. Bishop chuan sawrkawrin mipui himna atana ruahmanna a siam chu a tha thei ang bera zawm an tum tih a sawi a. An kohhran chuan sacrament 'mass' an ngai pawimawh tih sawiin inkhawm tur pawh an inthen dawn niin a sawi.

United Penticostal Church (NEI) chuan vawiin atanga inkhawm an kalpui tur chu sawrkar SOP anga kalpui a nih tur thu General Secretary Rev. R. Lalrinsanga chuan a sawi a, Sunday School anga kalpui a nih tur thu a sawi. Anni hi chuan chawhma inkhawm bak neih an tum lem lo nia sawiin vawi hnih nei pawh an awm theih thu a sawi lang tel.

Baptist Church of Mizoram pawhin inkhawm chungchang chu tualchhung kohhran kutah an dah a, chawhma lamah inkhawm pangngai neih a, chawhnu lamah fellowship (TKP, BMP leh BKHP) te tan inkhawmna hun buatsaih an tum hlawm. Hetih lai hian BCM kohhran zingah la inkhawm hrih loh a, sawrkarin zau lehzuala a phal huna inkhawm tum pawh an awm nia hriat a ni.

Salvation Army lam hian kalphung an neih thin angin Pathianni inkhawm hi kalpui an tum tlangpui deuh vek niin hriat a ni a. Chawhma lamah thuhril inkhawm leh Sunday School neih an tum a, chawhnu lam hi section hrang hrang ten an in-chanchhawk dawn niin, Corps hrang hrang hmalakna erawh a danglam hret thei niin an sawi hlawm.