DOWNLOAD OUR APP

Read latest news on your phone
app-store
FEATURE - Khaw entawn tlak Leng
Sep 05, 2022

Mizoram khawchhak lam, India leh Myanmar inrina bul maia awm, Leng khua chuan tun hnai khan an hnathawh that avangin Panchayat hnathawk tha leh National Water Award 2019 lawmman an dawng a. Leng hi E. Lungdar RD block-a awm niin in 195 vel an ni a, Mizoram khaw fai zinga chhiar tel an ni bawk.

Leng khua hian ram chhunga tuihna humhalh leh enkawl thate tana sawrkar laipuiin lawmman a siam, ‘National Water Award 2019’ chu Leng leh Ailawng khuaten an dawng a. PHE Department leh Central YMA ten Mizorama tuihna humhalh leh a awmsa tihpun kawnga nasa taka beihpui a thlak vanga he lawmman hi dawng an ni a. Hei mai bakah hian Ministry of Panchayati Raj & Women & Child Development chuan hmeichhe dinhmun chawisan kawnga an thawh that avangin India rama Panchayat hnathawk tha pariat zingah a thlang bawk a, hei hian lawmman tangkafai nuai 15 a keng tel a ni.

Hmeichhe dinhmun chawisan kawnga an thawh that avang hian August 24, 2022 hian Lêng Village Council President B. Vanlalfinga chu Kochi, Kerela-ah presentation pe tura thlan niin LAD hotute nen an kal a ni.

Hmeichhe dinhmun chawikan kawnga an hnathawh dan sawiin Leng VCP B.Vanlalfinga chuan, “Mizo hmeichhiate hi rorelnaa tel turin tihchak an ngai tih kan hria a, mipate nen kan awmho chuan an ngaihdan leh duh dan te an sawi ngam ve thin loh avangin an duh duh an sawi ve theihna tur women gram sabha kan siam a. Hetah hian an ngaihdante duh tawka sawiin an thurelte chu an rawn thlen leh thin a, hetiang hi India ram hmun dangah tih a la awm ngai loh avangin sawrkar laipui chuan a bengkhawn ta hle a ni,” tiin Zalen a hrilh.

Leng VCP chuan hei mai bakah hian hmeichhe chak lo zawkte hnathawh tur leh inhlawhna tur an siamsak thin niin a sawi a. Chu mai bakah hmeichhiate chu current hmang lova serthlum vawn that dante zirtirin SPRM hnuaiah aieng chin dan te, a her dan leh a pack dan thlengin an zirtir niin a sawi bawk a. Heng an hnathawhte hi central-in tha an tih avangin an hnathawh leh chanchinte chu an zirchiang a, hmarchhak bial bakah West Bengal state huam telin Panchayat hnathawk tha berah an rawn thlang ta niin a sawi bawk.

Tuihna tipung leh humhalh zawnga an hmalak dan Zalen zawhna chhangin B.Vanlalfinga chuan, “Leng khuaa tuihna awmna zawng zawng catchment area zawng zawng chu nakin thlenga vah leh tihchereu phal loh turin vantlang inkhawmah kan rel a. Chubakah ruahtui leia luangral mai mai tur ven nan contour trench laiin ruahtui a kal ral mai mai loh nan hma kan la a. Hei mai bakah a theih ang angin thing kan phun bawk,” a ti bawk.

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh