Kum tinin April thla hi khawro lai leh lum lai a ni a. Mizo upate phei chuan ‘Thalva ek char lai’ an lo ti thin. Hetih hunlai hian tuihna te kangin tui a tlem a, khua a lum bawk avangin vur zuarte an inhralh thei hle.

Aizawl khawpuia vur (ice cream) siamtu lar tak, Queens ice cream siamtute chuan tunlai hian an inhralh nasa hle nia sawiin a zuar chhawngte hnenah an pe daih meuh lo niin ZALEN an hrilh.

“Keini hian item 12 vel kan siam a, kan ice cream siam hi Rs. 5 atanga family pack, Rs. 150 man vel thlengin kan siam a. Kan siam engpawh hi tun lai chu kan hralh kal em em vek mai a. Dawr lama zuar chhawngte hnenah pawh kan pe hneh meuh lo a ni,” an ti.

Ice cream leh cake siamtu lar tak, USA-a hmunpui neia khawvel ram hrang hranga inzar pharh mek Baskin Robbins dawra thawkte pawhin tunlai chu an inhralh nasa hle niin an sawi a. Tun hnaia ice cream chu an chah thlen avangin stock an la nei tha hrih niin an sawi bawk.

Aizawl khawpuia vur, dhoi leh lassi siam thin pa pakhat pawhin khaw lum vangin an thil siamte an hralh nasa niin ZALEN a hrilh bawk a. “Vur, dhoi leh lassi te siamin dawr hrang hrangah kan pe kual thin a. Tunlai chu kan vannei nge ni, kan thil siamte hralh a kal hle a, tlaivarten kan siam chungin kan pe hneh lo a ni,” a ti bawk.

Cold drinks leh coffee dawr ngahktu nu pakhat chuan tunlai hian vur leh thil vawt an zawrhte an hralh kal hle tih a sawi a. “Ice cream min petute hian min pe hneh lo a, lei tum tam tak hian lei tur an nei thin lo a, a hrehawm duh thin khawp mai,” a ti bawk a. Hetih lai hian an coffee khawl erawh chu an off hrih niin a sawi ve bawk.

Mi thiamte chuan khaw lum hi a la kiang mai dawn lo niin an sawi a; chuvangin, vur hi thil hralh kal tak a la ni zel dawn niin a lang.