Aizawl khawpuiin nasa takin hma a sawn a, eizawnna hrang hrang a piang chho mek zel. Hnathawkin kan tul em em a, thenkhat chu eizawnna leh zirlai an nih avangin hostel ah an awm a, thenkhat chhun lama buai em em, zan lama hun thawl neih duh an awm bawk. Eizawnna hrang hrang lo piang zelah Food truck hi ngaimawh hlawh leh tantu ngah, inhnialna titam tu ber a ni hial awm e. Titi na leh social media ah sawi a tam a, hnawk tia tihtawp duh an awm laiin awm zui zel se duh an tam hle. Thudawn tunah hian Aizawl Municipal Councuil chuan an dinnna tur hmun nghet siamsak tumin a buaipui mek bawk a ni.

Aizawl khawpui lunlai Mahatma Gandhi lim kawtah food truck te hi an inpho thin a, dawrtu pawh an ngahin dawr neitu te pawhin an hlawkpui hle. Mahse harsatna thleng a awm avangin Dawrpui Local Council chuan September 2,2019 atang khan helai hmunah hian inzuar tawh lo turin an hriattir a, hmun khata awmho thei lovin food truck neitu te hi hmun hrang hrangah an inzuar mek.

Zalen thudawn danin tun dinhmunah food truck nei hi mi 5 an awm mek a, a thar siam tum mi 2 an awm bawk. Tunhmaa an inzawrhna thin, Mahatma Gandhi lim tualah an inzawrh theih tawh loh avangin Bawngkawn ah 2, New Capital Complex, City Park kawt leh Bungkawn vengah te an inpho ta a, tuna an inphona veng ah hi chuan harsatna an tawk lem lo nia thudawn a ni.

Food truck neitu te chuan zantir atanga inpho tanin dar 11 vel thleng te an inpho (inzuar) thin niin an sawi a, chawhrualin zan khatah Rs. 8,000 atanga Rs. 15,000 inkar te an hralh thin niin Zalen chuan thu a dawng a. An dawr chu mipui in an chhawr tangkai hle nia an hriat thu an sawi bawk a. Food truck chu a then loan hmanga bultan an ni tih sawiin food truck siamtu te chu Aizawla mi vek an ni a, an zinga mi Zo Global chauh hi Planning Dept. hnuaia sawrkar scheme 'EDS' sponsored nia thudawn a ni.

Food truck chungchangah pa pakhat chuan zan rei tak tak thlenga ding an nih avangin ruihtheih thil ti thin leh mi awmtha duhlo te a kohkhawm avangin tihtawp nise a duh thu a sawi a. Hetih lai hian tlangval pakhat erawh chuan zan lama eitur lamna a awm chu tha hlea a hriat thu a sawi thung.

Misual an hipkhawm nia sawi chungchangah dan leh thupek kengkawhtu lam tha tih chak tul a tih thu sawiin mi awmtha duh lo tlem te avanga mipui harsatna siam chu tha a tih loh thu a sawi ve thung.