FEATURE - Krismas Pual Thisen pek

Admin - Dec 05, 2021

Blood bank hrang hrangah an huaihawt leh mek

Association for Voluntary Blood Donation (AVBD), Mizoram State AIDS Control Society (MSACS) leh blood bank-te tangrual chuan Krismas pualin thisen pek runpui an huaihawt thin a, kum thum an huaihawt tawhah thisen unit 3,037 pek tawh niin, kum inah pawh blood bank hrang hrangah an huaihawt leh mek.

Krismas puala thisen pek hi kum 2018 atangin Aizawl-ah tan a ni a, kum 2020 atangin district danga blood bank-ah te pawh huaihawt tan a ni bawk. Aizawl bikah chuan kum 2018-ah thisen unit 568 leh kum 2019-ah unit 527 pek a ni a, kum 2020 khan Aizawl leh district hrang hranga blood bank-ah unit 1,942 pek a ni. Krismas puala thisen pek tawh zat chu a vaiin unit 3,037 a ni.

Kumin bika Krismas pual thisen pek rûnpui kalpui mek chu December 1, 2021 khan Civil Hospital Blood Bank-ah Civil Hospital medical superintendent Dr Lalhmuchhuaka'n a hawng. District dangah te pawh hawn a ni a, mi eng emaw zatin thisen an pe tawh a ni.

Aizawla a hawnna inkhawmah hian AVBD president C Lalnunnema chuan, December leh January thla chu pawl hrang hrangte an buai thla a nih avangin thisen pek a tlem thin tih sawiin, "Chutih laiin, rîkrum thil leh chetsualna thleng te avangin hunpui vuakvêt hi thisen mamawh a tam thla a ni," a ti a; chuvang chuan Krismas puala thisen pek rûnpui an huaihawt tih a sawi.

AVBD President chuan, mihringte chhandamtu Isua Krista chu kraws-ah thisen chhuak-in mihringte dam nan a nun a hlan tih sawiin, "Isua ringtu leh zuitute chuan kan entawn tur tha ber a ni a, damlo te'n damna an chan theih nan Isua pian champha lawm nan thisen pe turin kan insáwm a ni," a ti.

Kumina Krismas pual thisen pek rûnpui buatsaih nan hian AVBD Gen. Hqrs. chuan district hrang hranga an branch-te hnenah Rs. 5,000 theuh an pe a, chungte chu blood bank hmunhma chei mawina atan leh thisen petute ei leh in atana tih a ni.

AVBD hruaitute sawi danin, thisen pek rûnpui hian kumin December thla chhung a awh dawn a, thisen pe duhte chuan blood bank-ah kala thisen pek mai tur a ni a. Thisen pete hnenah ei leh in tuihnái zawk hlui thin a ni bawk.

AVBD chuan, mihringte chhandamna atana thisen chhuak khawpa tuartu Isua Krista piang lawm nan leh nunna atana thisen mamawhtu damlote chhan chhuah nan thisen pe turin Mizoram thalaite an sawm a ni.

AVBD hruaitute chuan, Krismas pual thisen pek runpuia thisen petute ei leh in senso atan tanpuina petu an awm tih an sawi a; December 4, 2021 thlengin kumin bika BCM, Shalom Kohhran, Mission Vengthlang leh PCCF Office atangin pawisa an dawng tawh tih sawiin, an lawm tak zet thu an sawi a ni.

Share now