Chapchar Kût puala Commerce & Industries department leh Information & Public Relations department-in stall bakah painting & photo exhibition an buatsaih chuan mipui hlut a hlawhin tlawhtu an tam hle a. Stall hrang hrang pawh an inhralh tha hle.

ZALEN-in a tlawhnaah Commerce & Industries buatsaiha stall hrang hrang inhawngte chuan an thil phochhuahte an hralh tha hle tih an sawi a. Thawmhnaw zawrhna dawr nghaltute chuan hralh tha hle tih an sawi a, “Chapchar Kût pual hian kan thil zawrhte kan titlawm (discount) a, ni dang ai chuan kan hralh tha hle. A bikin puan, Mizo kawr leh lukhum kan hralh kal zual a ni,” an ti.

Information & Public relations department bultuma painting & photo exhibition buatsaih pawh tlawhtu an tam hle a. Photo exhibition buatsaihtu Mizo Photographers’ Society hruaitute chuan, “Kan thlalak phochhuahte mipuiin an hlut hle a, kan phochhuahte hi Rs. 3,000 kan chhiar a, kan hralh ve nual,” an ti.

Painting exhibition nghaktute pawhin an lemziak phochhuahte chu a duh tan lei theih a ni tih sawiin a man erawh an ziaktu azirin a inang lo nia sawiin lemziak 10 chuang an hralh niin an sawi.

Ei leh in zawrhna dawr pawhin an hralh tha nia sawiin, a bikin Chapchar Kût ni hnih (March 6&7)-ah an inhralh tha zual niin an sawi bawk.

Hetih lai hian Dr. C.Lalthanga building bul vela dawr neite chuan an dawr kawta stall siam a nih avangin an thilsiamte an hralh hlei thei lo niin an sawi ve thung a. “Kan dawr hliah vekin stall an siam avangin kan inhralh thei lo a. Kût hi kan inhralh ve theih hun a nih avangin kan nghakhlel a; mahse, kan thil zawrhte an hliah vek avangin kan inhralh meuh lo a ni,” an ti ve thung.

Nikum lamah ni li chhung leh kuminah ni nga chhung stall hi siam a nih avangin an tuar hle niin an sawi a. An lungawi lohna hi Aizawl Municipal Corporation leh Commerce & Industries department-ah te thlen bawk mah se awmzia a nei lem lo niin an sawi a. Chief minister hnenah pawh an harsatna hi an thlen niin an sawi a, helai vela dawr pasarih bakah taxi stand chuan harsatna an tawk niin an sawi bawk.

Kumin Chapchar Kût hi mipuiin an hlut hle a, Lammual chhung leh a velah mipui an thanem hle a. Mi an tam avang hian lirthei tlan dan pawh tihdanglam a ni a, lirthei chevel pawh a buai phah hle.

Pa pakhat chuan, “Kût kan hmanna hmun hi hmun dang remchang awm thei se ka duh hle mai. Lammual-a kan hman hi pan vel chu a remchang hle a, chutih rualin lirthei hmangtute tan a buaithlak hle a. Eng emaw thil hman hmawh leh damlohna thilah damdawi in pawh pan duh ila a buaithlak hle mai a, thuneitute hian ngaihtuahna thar seng thei se ka duh hle a ni,” tiin ZALEN a hrilh bawk.