Covid 19 vanga lockdown puan a nih khan ni 2/1 chhung mipuite kan mangang hman a, mahse hei hi Mizorama kuthnathawk te chuan hmang tangkaiin an tan malsawmna a ni thung.

Mihringte hi chaw awm mah se, chawhmeh a awm loh chuan a buai-thlak thin. Harsatna Mizoramin a tawh tak avangin kuthnathawkte pawi-mawhzia leh an tel lova mipuite kan khawsak theih lohzia a lang lehzual a, an thlai thar te lei tumin kan inchuh zo duak duak a ni ber e. Thlai chingtute chu lock down in a tibuai ve lo a, an thlai hralhna nih inchuhin mipuite kan buai zawk a ni.

Local task force member pakhat chuan tun lock down chu Mizo mipuite harhtharna leh kuthnathawktu te malsawmna nia a hriat thu a sawi a. "Mizote hian kuthna kan thawk tlem ta hle a, mahnia chuktuah huan nei pawhin thlai chin kan tum ta meuh lo a, chu ai chuan phai lam atanga lo lut te lo lei mai kan duh thin. Tuna harsatna kan tawh takah hian min bengharhtu ni thei se ka duh hle a. Kawng leh lamah chuan mi taima te tan malsawmna a ni hi lawmawm ka ti a. Serchhip lama zikhlum ching te pawhin kumdangah chuan an hralh hleihtheih loh bakah tlawm deuh deuh ten an hralh a ngai a. Kuminah erawh chuan man to zawkin an hralh thei a, anni ang bawkin hmun hrang hranga huan siam ten an hralh thei hi lawmawm ka ti hle a ni," a ti.

Kuthnathawka ei-zawng pa pakhat pawhin, "Kan ram hi a tha a, thlai engpawh ching ila a ngeih vek mai a. Tunhma pawhin kan pi leh pute kha an intodelh thei a, tuna kan harsatna tawh hi min kaiharhtu ni se ka duh hle a ni," tiin Zalen palai a hrilh. Thlai ah hian chakna a tam a, khawvel ram hrang hrang thlirin sa ei tam ai chuan thlai ei tam chu an hrisel zawk zel a ni. Chutih rual erawh chuan Mizoten kan thiamloh pakhat erawh chu thlai rah leh anhneh kan siamin kan ti hmin lutuk thin a, hei hian a chakna tam tak a tihbo theih avangin siam danah pawh fimkhur a ngai hle.

Mizo upa te chuan 'Good Friday laia thlai chi thlak hi a to duh bik' an ti thin a. Lo kan hal zo deuh chiah a, good friday pawh kan hmang zo deuh chiah bawk a. Tunlai hi thlai chi thlak hun lai tak a ni bawk nen lo leh huan siam thei te chuan tan han la lehzual se.

Thlai hrisel leh tharlam Mizo mipui ten kan ei thei ang a, chumai bakah phai lama Mizoram sum tam tak luangral thin hi a ziaawm ang a, kan tuallaiah ngei sum leng vak a tam phah dawn a ni.