Retailer then khatah chuan kutze thla enfiahna khawl e-POS hmang chauhin ration a lak theih tawh a, finger-print hlauh hleih theih pawh a ni tawh loa, aadhar card phei chu a ngai ngei ngei dawn a ni.

Zalen palaiin Food, Civil Supplies & Consumer Affairs (FCS&CA) department thawktute hnen atanga thu a dawn danin electronic point of sale (EPOS) hi sawrkar laipuiin hmang tura an tih avanga hmang an ni tih sawiin hei hian buhfai bo thlau tur a veng dawn niin an sawi.

ePOS ah chuan ration card data base leh Aadhar card thlunzawm anih avangin ration card neitu tan lo chuan ration buhfai a lak theih tawh dawn lo a. Ration la tur ten an Aadhar card number sawiin ePOS ah hian an kutzung nen nemin a inmil chauhin an ration an la thei tawh dawn a ni. Aadhar card nei lo tan chuan ration buhfai a lak theih tawh dawn lo a, engemaw harsatna avanga ‘link’ lo palh an awm anih chuan an chungchang chu a bika ngaihtuah theih anih dawn thu an sawi.

FCS&CA thawktute chuan ePOS chu a bultanna (1st phase) atan Aizawl khawpui chheh velah bul tan phawt an tum tih Zalen an hrilh a, ruahman dan chuan September thla chhung hian Aizawl khawpui chhehvela Fair Price Shop 150 vel tuamchhuah an tum tih an sawi bawk. ePOS leina man chu central leh state ten an intum sem dawn tih sawiin a man atan hian buhfai quintal khat zelah Rs. 38.94 lak a ni dawn tih an sawi bawk.

ePOS hman anih hun chuan retailer ten kudam atanga buhfai an lak zat leh an sem zat te chiang taka hriattheih a ni tawh dawn a, mipui quota an sem zo lo anih chuan an sem zawh bak chu a thla leha an quota ah belh sak zel an ni dawn a, hei hian buhfai hralh ruk leh bo thlau tur a ven rin a ni.

ePOS ah chuan Ration card a Aadhaar number dah (link) tu emaw ber kha a lo kal anga, fingerprint scanner ah a kut zungtang a nem anga, aadhaar number leh a kutze thla a inmil chuan an chhungkaw ration lak theih zat chiah a la thei tawh ang. He khawl hian a bukna lam pawh thlunzawmin ‘server’ lamah lak zat chhin chhiah a ni zel dawn a ni.

Thudawn danin Mizoram pumah retailer (FPS) 1252 an awm mek a, quintal khat zelah Rs. 143 leh Non FSA hnuaia an semah quintal khat zelah Rs.50 an hlawh.