Mizote hi ziak leh chhiar thiam lamah kan sang hle a. Mizoram phei chu India ramah pahnihna kan hauh hial a ni. Mizoram khawthlang leh chhim lamah tlema la chenbeh deuh mi thenkhat avangin ziak leh chhiar thiam lamah kan la hnufual deuh a, Mizo chen tamna ah chuan ziak leh chhiar thiam lo der chu kan awm awmlo e.

Lehkha chhiar tam thin kan ni a, tunhma deuh chuan cowboy bu a ni emaw nula leh tlangval inhmangaihna lam thawnthu bu te chuan chhiar a hlawh thin hle a. Library leh midang ta hawhin kan chhiar nasa thin a, lehkhabu buatsaihtute tan pawh a hlawk a, eizawnna tha tak a ni thin. Mahse tunah erawh chuan lehkha chhiar kan thatchhiain kan Library te chuan tlawhtu an nei tlem sawt hle.

Aizawl Dawrpui a lehkhabu dawr neitu pakhat chuan lehkhabu hralh chu a har sawt hle niin a sawi a, an dawr atanga lehkhabu an hralh tam ber chu zirlaibu a ni tih a sawi. "Tunhma chuan cowboy bu leh love story 'M&B' te hi kan hralh nasa hle a. Mahse tunah chuan an hralh theih loh avangin heng bu te hi kan kudam ah hnawk deuhin kan dah mai mai tawh a. Lehkhabu ah chuan MAL in 'Book of the Year' atana an puan te hi tlemin a hralh theih deuh e tih mai chauh a ni,” tiin Zalen palai a hrilh.

Mizoram State Library thawktute chuan Library tlawhtu chu tunhma ai chuan an tlem deuh tih sawiin a chhan ni theia an rin zingah an awmna chu mipui tan pan a harsat tak deuh vang nia an hriat thu an sawi. Mizote chu lehkha chhiar lamah kan taima tawk lo tih sawiin tunlaiah social media lamah khawih tur a tam vang a ni thei tih an sawi bawk. Mizoram State Library tlawhtu zingah hian zirlai an tam ber a, zirlai ten nasa zawka an tlawh theihnan 'carreer guidance section' siam tumin hma an la mek.

Mizoram University Librarian pakhat chuan lehkha chhiar lama kan tlakhniam chhan chu 'taimak tawk loh vang' nia an hriat thu Zalen palai a hrilh a. An zirlai te zingah lehkhabu hawh duh tam mahse library a lehkha chhiar melh melh peih chu zirlai 3000 vel zingah 50 vel chauh an nia a hriat thu a sawi a. Mahse tunhnaiah zirlaite chu lehkah chhiar lamah an harhthar nia a hriat thu a sawi bawk.