DOWNLOAD OUR APP

Read latest news on your phone
app-store

FEATURE : Local Zu a hlauhawm

Jan 25, 2023

Excise & Narcotics department thawktute chuan Aizawl leh a chhehvela zute chu a siam dan a dik loh avangin hriselna atan a pawi thei hle a, zu in thinte pawhin in lo thei se an duh tih an sawi.

Excise & Narcotics department thawktute chuan Aizawl leh a chhehvela zute chu a siam dan a dik loh avangin hriselna atan a pawi thei hle a, zu in thinte pawhin in lo thei se an duh tih an sawi. Excise & Narcotics department officer pakhat chuan, “Tun hma rakzute kha chu buh chhum hminin zan thumte an up hnuah an thlawr chauh thin a. Khatiang kha chu mihring pawhin kan chhiatpui har a. Mahse, tunlai zu erawh khatianga buh chhum kha awm tawh lovin zan khat thil thu-ah zu-ah an chantir thin avangin a him lo hle a, zu in thinte zingah chhiatpui an tam hle a ni,” a ti.

Tunlaia zu an siam dan sawiin Excise & Narcotics department officer chuan, “Zu zuara eizawngte hian lei lai khuarin tui an dah a, chu chu damdawi pawlhin zan khat lekah zu-ah an chantir mai thin a. Sazu, rul leh nungcha dangte lutin a tawp thei hle a ni,” a ti. 

Zu in miten tunlai zu an chhiatpui nasa tih sawi bawkin, “Zu hi a thianghlim loh avangin natna chi hrang hrang pumna, nerve tha lo, lung leh thin tha lo an tam hle a. Zu in mi muhlum mai mai leh heart attack an tam hle a ni,” a ti bawk. Thudawn danin tun hnaia doctor-ten pum tha lo, thin tha lo leh tha na an enkawlte chu a tlangpuiin zu in mi an ni zel niin an sawi.

Excise & Narcotics department thawktute chuan Rangvamual leh Phunchawng velah zu factory 400 vel a awm nia sawiin beihpui an thlak pawhin ni khatah factory 30 vel chauh an tichhe thei nia sawiin khawlaia zu in mi vai (man) ai chuan a siamna lam chhut chah chu a pawimawh zawk nia an hriat vangin helamah hian tan an la deuh niin an sawi a. Aizawl khawpui chhehvela zu siam thin tam ber chu Burma lam mi nia an hriat thu sawiin heng zu thlawr thinte hian an hlawh a tam nan ni khatah a tam thei ang ber thlawr an tum thin nia an hriat thu Zalen an hrilh bawk.

Pa pakhat pawhin tunlai zu chu a hlauhawm nia a hriat thu sawiin, “Tunhma rakzu in thinte kha chuan an chhiatpui har hle a, ni tin in thinte pawh an upat hunah an hnar te a tawk (sen) chauh a. Mahse tunlaiah erawh hetianga hnar tawk leh zu ngawl vei hman pawh awm lovin an thi mai zel a, chuvangin a hlauhawm hle niin ka hria," a ti ve bawk.  

Share now