Covid-19 vangin kan buai a, mi sing tel an thi tawh a. Khawvel thiamna sang tawh takah he natna laka invenna emaw tihdamna emaw hmuh a la ni lo. He hrileng vang hian India ram pawh a buai a, mipuite kan him zawk nan inkharkhip 'Lock down' chu kalpui mek a ni.

India ramah chuan March ni 25,2020 atangin inkharkhip 'lock down' hi kalpui a ni a, Mizoramah erawh March ni 23,2020 atangin lockdown a ni. Lock down hi ruahmanna hmasa ah chuan April ni 14,2020 hian a tawp dawn a, hetih lai hian kar hnih chhung pawhsei tumin PM chuan a puang a ni.

Lock down pawhsei hi hrileng do na leh invenna tha ber a ngaih a nih avangin Doctor thiam te thlirna atang chuan pawhsei hi tih makmawh a ni. Chutih rual erawh chuan a nghawng tur hi thui tak ngaihtuah tel a tul. Mizoram mipui 80% vel hi kuthnathawka eizawng an ni a, heng mite hi hnathawk thei lovin kan hrek (khung) bet reng a, an tan engemawti tala ei an hmuhna tur ngaihtuah tel a pawimawh ta hle mai. Aizawl khawpui ngeiah pawh nitina inhlawh, mi dawra thawk, taxi driver etc. thahnem tak an awm a, heng mite hmabak tur hi ruahman a ngai ta hle.

Veng pakhata local task force hruaitu chuan, "Nitin chhuanchham chawm tur hi a ni telin kan ngah tulh tulh a, tun dinhmunah chuan mi inphalte zarah ei leh in kan la pe thei hram hram a. Lock down hi pawhsei leh anih chuan chhuanchham hi an pung zel dawn tihna a ni a, a huphurhawm khawp mai," tiin Zalen palai a hrilh a. Sawrkar hian local task force te kutah hian sum leh pai tam zawk pe thei se a duh tih a sawi bawk.

Pa pakhat chuan khawvel hmun hrang hrang leh India ram ngeiah pawh mi hausa te an luangchhuak nasa tih sawiin tun hun hi an luanchhuahna tur hun dik tak nia a hriat thu a sawi a. Mahni theih ang tawkin mi harsate puih nan luangchhuak thei ila kan zavaia tan a ni dawn tih sawiin mi hausa te hi intel khawmin rawn pen chhuak leh zual thei se a duh thu a sawi bawk.