Hripui kan buaipui mek Covid-19 avanga khawvel a buai nuaih nuaih karah Mizoram pawhin Lockdown te, Partial lockdown te, Unlock te kan neih hnuah kar hmasa chho khan Lockdown puan leh a ni. Covid-19 kai kan pun ngaihtuah leh kai pakhat kan neih laia kan dinhmun thlir hian mipui lam hi chuan ngaiah kan nei tan ni te pawh hian a ngaih theih a, chutih rualin tun hnaiah he hrileng kan pun tak hnuah chuan kan boruak erawh a dang leh ta hret niin a ngaih theih a, doctor-te chuan kan inthlahdah hma thin deuhah an ngai a, ni 14 quarantine hi kalpui theih ni se an duh.

Kar kalta chho a sawrkarin Lockdown a puan hma pawh khan Aizawl leh khaw tam takah, veng bil leh khaw bilten an khua leh tuite dinhmun azirin lockdown leh an veng khawi emaw laite tlawhpawh phal loh an nei hlawm. Covid-19 hri kai an hmun tlawhte lo tlawh ve te an awm avangin veng tam tak chuan an veng chhung mite chu home quarantine-te an tihtir a, veng pakhat chuan an veng mite a huhovin an khungkhawm hial. Veng thenkhat chu contact tracing neih hnuah kal chilhin swap sample lakkhawm a ni a, thawktu lam pawh an rim phah hle a, hetianga swap sample test-a thawhchhuah hi India ram hmun dangah chuan a awm ngai lo hial niin hriat a ni.

Indian Medical Association lama an hruaitu pakhat chuan tunlaia veng tam takin an huam chhunga lockdown an puang thin chu hri leng laka himna atan thil tha tak nia a hriat thu a sawi a, “Mizoramah pawh sawrkarin containment zone an puang a, state dangahte pawh mi dang tlawhpawh an phal loh ang kha a ni a, hei hi chu a tha, contact tracing neih pawh a awlsam theih phah a ni,” a ti.

Result negative tih vanga kan inthlahdah hma thin deuh erawh fuh a tih loh thu Doctor hian ZALEN a hrilh a, natna inkhuar chhung (incubation period) hi chu inkhunghran (quarantine) ni thei se, tih chu IMA lam ngaihdan a nih thu a sawi. “Ni li ni nga hnu tala test neih hi a tha, hemi hnu hian a result chu a lo negative pawh a ni thei a; mahse, ni 14 tal hi chu inkhung theih ni se a tha. False negative pawh thil awm thei a ni,” a ti.

Naupang leh kum upa lam chu inkhung tam a pawimawh hle thu a sawi a, naupang hi hri kaidarh nasa theitu an nih avangin mi dang chiahpiah lova an awm a pawimawh hle thu a sawi bawk.

Village/Local Level Task Force sawrkar lamin a din hi he hri venna atana thil pawimawh tak ni pawhin a hriat a, mahni veng/khua theuhah mipui an thunun kawngah an thawhhlawk a, chutihrual chuan inthlan hmabak kan nih avangin sawrkar leh tualchhung lamah pawh duhthusam ang chuan thil a kal thei lo a. Mipui lam erawh thu kan awih tlangpui ni hian a lang a (thu awih lo deuh chu awm mahse), hei vang hian tualchhungah pawh a la kaidarh nasa lo niin tam tak chuan an ngai ve bawk.