Vawk leh bawng lakluh a ni lo a, khawchhak lam atanga bungraw lut a awm hriat a ni lo. Phai lam atangin phai thlai erawh lak luh a ni reng a, a hma ang chu pha lo mah se, mamawh phuhru khawp chu a awm, a man erawh a hma ai chuan a to vek a, thenkhat phei chu to tak a ni.

Lockdown hma khan sawrkar chuan eng mah tito lo turin thuchhuah a siam a, veng leh khaw hrang hrang local level task force pawhin an huam chhunga thil zuarte an thil zawrh tito lo turin hriattirna an chhuah. A tir lamah chuan zawm a hlawh viau a; mahse, inkharkhip leh a chanve a kawngkhar hawn a nih hnuah thil man a sang chho nasa viau a, ‘Vegetable Supply Chain’ hi sawrkar hian nei ta lo phei se la chuan kan thlai man tur hi ngaituah ngam pawh a ni lo hial ang.

Lockdown hma eng emaw atang tawh khan vawk hi lak luh khap a ni tawh a, bawng pawh hi duh ang an lalut meuh tawh lo niin hriat a ni a, chuvang chuan inkharkhip chhung leh tlema inthlahdul chhung hian ranpui hi lak luh a ni lo. Chumi awmzia chu hemi chhunga heng sa kan leite hi tualchhung sa vek tihna a ni a, chutih laiin lockdown hma nena khaikhin chuan a man hi a sang ta vah. A zuartu lam chuan, “Kan ran leina a to a, a hma rate anga hralh chuan kan chawi a ngai, bawng talh tur zawn hi a hautak hle a, a zawnna lamah hian kan inseng nasa hle,” tiin ZALEN an hrilh.

Bawngsa bikah phei chuan a sa hralh dan pawh hmun thenkhatah chuan a danglam a, a ti hlang lei a rem lo a, a ruh nen sah pawlhin a man an hrut rual vek a, an hralhna man erawh a la a inang vek lo thung.

Vawk hrim hrim hi state thenawmah a hri a len avangin lak luh khap a ni a, vawk chu sawi loh, a sa hrim hrim pawh lakluh khap a ni a, hei vang hian tun laia kan vawksate hi chu tual vawk vek tih ngam a ni. Mizoram vawkah kan intodelh loh avangin tuna an talh chhunte hi a vulhtuten an tito a, vawk hi mi phal chiah lo chung chung te lei an dil lui thin niin vawk talh thinte chuan ZALEN an hrilh.

Sangha pawh a man a sang viau a, nimin Inrinni te phei kha chuan dil sangha hi kg-ah 450 te a tling chho hial a, dil sangha theuh theuh zawrh dan erawh a inang chuang lo. Nitina sangha zuar te hian mi dil te an khar tawp tawp thin a, dil neitu lam chhiar dana an lei a ngaih thin avangin, Sangha te thlenga an buaipui a ngai a, hei vang hian motor hire na leh hlawhfa man an chawi a san avangin a to lo thei lo niin an sawi. Phai Sangha a luh tam chuan tualchhung sangha rate pawh hi a tlak leh mai an rin thu an sawi bawk.

Lockdown lai hian Aizawl mai bakah Mizoram hmun hrang hrangah tunhma lama hmuh zen zen loh Burma lam siam Cigarette hmun tur a tam hle. A hma lama kan foreign Cigarette hmuh thin te chu a let aia tamin a to chho a, kan hmuh ngai loh ho pawh hi a hma lama foreign cigarette kan hmuh man let a ni vek. India Cigarette pawh hi a tir lamah kha chuan hun rei tak a man pangngaia hralh a ni a, Lockdown 2 tawp lamah erawh a let ten a pung ve bawk.

Cigarette kan hmuh ngai loh ho hi phai lam atanga rawn let chho leh a ni a, heng cigarette te hi phai lama kal tura Mizoram chhuahsan tawh, Lockdown hnua rawn let leh niin dawrkai pakhat chuan ZALEN a hrilh a, a sem kual thin te pawhin vai hnen atanga la thin an nih thu an sawi.