Hripui leng vangin Mizoramah pawh tum engemaw zat inkharkhip ‘lockdown’ a ni tawh a. Lockdown chungchangah hian inhnialna a tamin a duh pawl leh duh lo pawl an inthen deuh phawk mai niin a lang a, sawrkar tan pawh thutlukna siamthiam a har khawp ang.

Lockdown chung-changah hian Indian Medical Association Mizoram Branch a ziaktu lian Dr. Chawnglungmuana chuan, “Hri leng darh nasa lutuk tur ven nan hian khunghran (containment) hi hmalakna pawimawh tak a ni thin a. Hri kai/natna nei mek te'n midang an kai darh loh nan te, hri kai tawh la lang chhuak mai si lo zawn chhuah nan te, a la kai ve lote an him chhunzawm nante hman thin a ni. Chutih rual chuan pawimawh tak mai chu hri kai lo tura inven dan inzirtir leh nunphung thlak danglam nante pawh a pawimawh hle a. Lockdown hian hri darh hluai tur a veng a, a enkawl kawngah inbuatsaihna hun tha a thlen thin bawk. A buaithlakin ni tin khawsak leh ei leh bar zawn kawngah harsatna thlen mah se kan himna hi a pawimawh hmasak ber vangin sawrkar pawhin Lockdown a puang thin a ni,” a ti a.

“Khawvel hmun dangahte pawh hri leng darh zel loh nan an hmang fo a, thenkhat chu an inthlahdul hnua puang thar leh pawh an awm a. Pawimawh ber chu fimkhur nachang min hriat zualtir se, Lockdown phelh hunah pawha invenna kan hriatte nunphunga kan neih chhunzawm zel hi a ni a. Enkawl zawh loh hri kai neih ai chuan he lockdown hmanga inkaichhawnna kan han dang chat leh thin hi a hlu em em a, kan himna tur anih avangin mipuite pawhin kan tawrh hram hram a ngai a ni,” a ti bawk.

Mizorama sumdawng intelkhawm pawl Mizoram Merchant Association (MIMA) President PC Laldinthara chuan tun tum lockdown chu sumdawng pawlten an sawisel lem lo niin Zalen a hrilh a. “Hri leng hi vantlangah a darh tawh nia a lan avangin dawrkaite pawhin kai ve kan hlau a, kan bungrua te chu hralh thei lo mah ila sumdawng ho chu kan ngawi khawp mai,” a ti. MIMA President chuan hri leng chu sumdawngten an tuar hle tih sawiin, “Lockdown avanga hian ni 100 chuang dawr kan khar tawh a, kan hloh nasat bakah kan bungrua pawh kan chah thleng thei meuh lo a ni,” a ti bawk.

City bus lirthei neitu pakhat pawh lockdown leh hrileng chu an tuar hle niin Zalen a hrilh bawk a. “Ni danga kan sum hmuhna tha tak picnic hruai, khual khua zin leh hire ang chi kha a awm theih loh avangin kan tuar hle a. Hri leng avanga mipui inkhungte an chhuah leh mek laiin an pung chho leh a, chubakah lockdown an nih zel zel tak avang hian kan sum hmuhna te chhut chah a ni a, kan tuar hle a ni,” a ti. Aizawl city bus-te pawh hri leng avang hian kar khatah vawi 3 chauh an service thei nia sawiin driver leh conductor hlawh an pe thei ngawr ngawr chauh niin a sawi bawk.

Aizawl veng pakhata dawrkai pawhin lockdown chuan nasa takin a nghawng niin a sawi a. “Man chawiin mi dawr kan luah a, inkharkhip a nih chuan kan inhralh thei lo a. Kan dawr luah man a pangngaiin kan pe lo thei si lo va, chubakah ni dang aiin kan inhawn chhun-ah pawh kan hralh tlem a, kan tuar khawp mai,” a ti bawk.

Pa pakhat chuan lockdown chu hrehawm deuh mah se, chhungkua a hun tam zawk an hman theih avangin a lawmawm a tih thu a sawi thung a, “Ni dang-ah chuan hnathawka kan chhuah a tul a, kan hnathawhte a inan loh avangin chhungkaw kima chawhlui kil leh thil tihho kan nei khat hle a. Lockdown hi hrehawm viau mah se, chhungkua erawh kan inpawh phah zawk a, a lawmawm letling zawk hle in ka hria,” a ti.