Mizoramah March ni 23,2020 atangin hripui vanga inkharkhip ‘lockdown’ neih tan a ni a, lockdown hi eng emaw changin thlahdul ni thin mah se, hri leng avangin khualzin an tlem a. Mizoram khaw kar kawnga khualzin phur thin maxicab-te chu lockdown tuar ber zinga mi an ni.

Mizoram Maxicab Owners Association general secretary PC Hrangsailova chuan lockdown chuan nasa takin maxi cab te a nghawng niin a sawi a. “Lockdown chhungin tlan theih chang nei mah ila kan tlan theih loh hun a tam zawk a, hemi chhung hian kan driver chhawrte hlawh kan pe lo thei lo a. Mi tam tak chu loan hmanga lirthei leite kan ni a, heng mite tan hian rulh a harsa a. Bank lamin loan rulh thla pawtseiin hrethiam mah se an ngaihdam theih miau loh avangin a hlawma an rulh a ngai tho si a, phurrit a tling a ni,” a ti. MMOA ziaktu chuan lockdown thlahdul mah se, khualzin an awm tlem miau avang-in an buai tih sawiin, “Mipui veivak an tlem a, lirthei tlan thei mah ila a chuang tur an awm tlem a. Sawrkar rate siam angin kan tlan lo thei lova, a chang chuan kan chawi-belh hial thin a ni,” a ti bawk.

Maxicab counter nghaktu pakhat chuan lirtheite chu service pangngai tawh mah se, ni dang ngaihtuahin tlan an la tlem hle niin a sawi a. “Dawr luah man kan chawi lo thei lo a. Hei mai bakah khualzin an tlem avangin ni danga ticket hralhna atanga sum kan hmuh thin ang kha kan hmu thei ta lova, lockdown chu kan tuar khawp mai,” tiin a sawi bawk. Counter nghaktu chuan ni dangah chuan an counter atanga chhuak thinte chu an tlan hun an siam remsak thin tih sawiin tun lai-ah erawh chuan a rem ang ang an tlan mai niin a sawi.

Maxicab driver pakhat chuan an tihfuh chang lo chuan passenger an full ngai lo niin a sawi a, zin veivah chungchangah a passenger ten harsatna an tawk thin tih sawiin, “Ni danga hotel-a chaw kan ei mai thin ang kha a rem ta lo a. A chang chuan tiffin kan pai a, hmun thenkhatah chuan hotel neitute kan be lawk a, min lo funsak thin a. Tun hnai atang hian khaw thenkhatah chuan hotel a chaw ei phal te pawh an awm a, mahse inthlahrun a na duh khawp mai,” tiin a sawi. Maxicab driver chuan Aizawl atanga thingtlang lama kal turten harsatna an tawk zauh zauh niin a sawi.

Khaw thenkhat chuan Aizawl mi hrim hrim an hlauh bakah Covid 19 lakah an fihlim ngei tih lantirna emaw task force lehkha nei lo chu an khuaa luh phal lo pawh an awm niin a sawi bawk.

Mizoram Maxicab Owners Association hruaitute sawi danin tun dinhmunah member 2700 vel an awm a, khaw kar kawnga service thin maxicab thenkhat chu an hnena in ziaklut lo pawh an awm niin an sawi.