Kan hma lawkah Kristian te hunpui ber tia sawi thin Krismas leh Kumthar chu kan lo thleng leh dawn ta a, Krismas pual hian chhungkaw tinin thawmhnaw leh thil thar neih kan duh thin a. Mahni phak ang tawk tawkin thawmhnaw thar kan lei thin avangin bazar pawh a lun thin hle a, kumin ah erawh chuan hripui vangin bazar a lun lo hle a, sumdawng te pawhin kum dang an phak lo hle.

Zalen-in Aizawl khawpuia bazar lun ber New Market-a sumdawng hrang hrangte a kawmna ah kum dang an phak lo hle tih an sawi vek a. Thawmhnaw dawr neitu pakhat chuan kum dang nen chuan an thil hralh chungchangah tehkhin chi pawh a ni lo hial tih a sawi a. Thlasik thawmhnaw zuar dawr nghaktu pakhat pawhin kum danga an dawr vela mihring awm luih luih ang chi kha kumin ah chuan an reh duak niin a sawi bawk a. “Krismas bazarte hian thawmhnaw an lei mai bakah ni tin mamawh chi hrang hrang an lei tel thin avangin keini pawhin kan bungrua hi kan hralh nasa ve thin hle a. Mahse kumin erawh chu tihngaihna a awm lo a, kum danga January leh February thla ang vel chauh kha niin ka hria,” a ti. Thingtlang lam atanga bazar tura Aizawl lo lut an tlem avang hian sumdawng te pawhin an bungrua hi thingtlang lamah zawrh turin an thawn nasa hle nia thudawn a ni.

Aizawl New Market office thawktute pawhin kum danga mihring bit lutuk leh kal ngaihna awm lo ang chi kha kumin ah chuan a awm lo niin Zalen an hrilh a. Kum danga pawisa leh thil dang bo ang chi pawh kuminah chuan a awm lo a, mihring veivak pawh an tlem hle niin an sawi. New Market Beat Police duty te pawhin sualna leh thildang harsatna kum danga awm ang chi kha kumin hi chuan a awm meuh lo tih an sawi bawk a. “Kum dangah chuan thil bo report hi a awm deuh reng a, kumin ah erawh chuan kar khatah hetiang report dawn miah loh tumte kan nei a. Kum danga ‘Nihliap duty’ kan siam thin pawh kumin hi chuan siam a ngai lo mai thei a ni,” an ti.

Traffic duty te pawhin thingtlang lam atanga lirthei lut a tlem avangin kum danga traffic jam vanga harsatna an tawh thin ang kha an tawk lem lo niin an sawi a. “Thingtlang lam atanga lirthei lo lut a tlem a, chubakah mihring hi kan chhuak tlem hrim hrim bawk a. Office kai lai leh bân laia tlema jam harsatna kan tawk tih loh kum danga rei tak tak traffic jam ang chi kha chu a awm lem lo,” tiin a sawi bawk.

Hetih lai hian nu pakhat chuan Covid vanga Mas bazar a lun lo chu tha a tih zawk thu a sawi ve thung a. “Krismas pual hian kan neih zawng zawng kan inseng ral a, thenkhat phei chuan leiba kan insiam hial a. Isua lo pianna lam aia thil danga kan rilru leh ngaihtuahna kan pe nasa lutuk hi a tha ka ti lo va, kan sum leh pai kan hum theihna a ni dawn bawk nen Pathian remruat ah ka ngai hmiah mai a ni,” a ti ve thung.