Krismas leh Kumthar hi Mizoram kristian te tan chuan kan hunpui ber a ni a, chhungkaw tinin kan sum leh pai neih ang angin thawmhnaw thar tha kan lei a. Ei leh in lamah pawh theihtawp kan chhuah tlang bawk a, heng ni ropui lawmna atan hian kohhran hoten ropui takin ruai kan theh thin a ni. Kumin ah erawh hripui avangin Mas leh Kumthar ruai hi kan theh ang em tih chu zawhna pawimawh tak, mahse chhan mai har tak a ni ta.

Aizawl tlak lam veng pakhata Kohhran Upa chuan ruai lam buaipuitu leh hunpui lo thleng tura programme committee chu ruat phawt a, November thla Kohhran committee thutkhawmah thu tawp siam nise an ti niin Zalen a hrilh a. “Kohhran mipui zingah ruai theh loh mai duh an awm laiin thenkhat erawh chuan kohhran pum anga theh lovin Upa bial a insemdarhin theh mai an rawt bawk a, thutlukna siam a har hrih khawp mai,” a ti.

Veng pakhata Krismas leh Kumthar ruai committee Treasurer chuan kohhran committee in thutlukna la siam chiah lo mahse ruai theh chu a theih a rin loh thu a sawi a, kohhran mipui zingah pawh ruai a theh theih loh ring an tam avangin thawhlawm lut pawh kumtir lam ai chuan a tlem zawk niin a sawi.

Aizawl chhuah lam kohhran pakhata Krismas leh Kumthar ruai committee secretary chuan tunhnai khan committee neiin ruai theh chungchang hi an sawiho a, boruak awmdan thlir phawt an rel niin a sawi a. “Ruai theh tura inruahman phawtin mawhphurtu tur pawh kan inruat a, a hun lo thleng se sawiho lehah kan ti,” tiin Zalen a hrilh.

Pastor pakhat pawhin thawhlawm ip (envelope) a Krismas thawhlawm kan thawh thin chu la kal zel se kan ti a, mahse sawrkar thu kan ngaihchan hrih avangin kum danga ran lo zawn lawk leh hauh ang chi kha chu kumin hi chuan kan ti hrih lo niin a sawi.

Mizote kristian kan nih chinah Mizoram buai vanga krismas hman mumal loh a awm tih loh chu kumin hi krismas hman mumal theih a nih loh kum a ni thei niin pa pakhat chuan a sawi a. “Ruai theh hi tum pawh ni ila mi tam tak chu ruaitheh tura kal pawh an ngam dawn lo a, chu bakah kum danga fatu thin tam tak an chhuah dawn loh avangin ruai pawh hi kan puitlin lovang tih a hlauhawm a. Kan thawhlawm awm ang ang te hi dahtha ta mai ila, nakum lamah zangkhai zawkin hmang mai ila ka duh a ni,” tiin a sawi bawk.

Mizote rilru-ah ruai theh nan chuan ran ke 4 nei ngei hi talh kan duh thin a. Thenawm ram Myanmar leh Assam-ah te vawk natna chi khat African Swine Fever a len avangin ram dang atangin vawk lak luh theih a ni lo a, ruai thehna tura kan mamawh khawp vawk hi tual chhungah kan hmu thei ang em tih chu zawh-na awm thei a ni a. Hei bakah hian bawng pawh hi kan mamawh khawp kan hmu ang em tih pawh chhan mai har tak a ni bawk. Engpawhnise kumin hian Mas ruai kan theh dawn leh dawn loh chu a hun takah a hriat mai dawn e.