Reserve Bank of India chuan mipuite mamawhna thlir chungin pawisa note hrang hrang a siamchhuak thin a. Tunhma deuh chuan naia 1,2, 5, 10 te siamin tangkai taka hman a ni a. Hun a kal leh deuh a, siki (paise 25) leh duli (paise 50) te chu tun dinhmunah chuan hmanna a awm ta meuh lo a, pawisa thir zingah pawh Re.1 chunglam lo chu hmanna a awm ta lo. Tunhma lama a lehkha chauha awm thin Rs. 5 leh Rs. 10 te chu thir (coin) a siam a ni leh ta a, mahse Rs. 10 thir erawh hman a har avangin hnawksak a chang ta hial mai.

Rs. 10 thir hi engvanga hnawng nge tih hriatchian ni chiah lo mahse mipuite intihthaihna vang nia hriat a ni. Mi thenkhat ten social media lamah ‘Rs. 10 coin lem a awm’ nia an tarlan avangin hman a har tan niin an sawi a, heta tang hian mipui ten an induh loh siak a, sumdawng te pawhin an dawng duh ta lo a, mipuite pawhin dawn an hreh avangin hman a har ta nia thudawn a ni.

Zalen palaiin Rs. 10 thir chungchanga thil awmdan a zawhna ah State Bank of India (SBI) thawktute chuan, "Eng thil leina atan pawh Rs.10 thir hi a hman theih a, pawm tlang vek ila chuan harsatna hi a awm lo tur a ni. RBI pawhin a hman theih thu mipuite a hriattir a ni," an ti. SBI in Rs. 10 thir an thleng duh lo nia sawi chu a dik lo tih sawiin, “Kan thleng thei a; mahse, Bank dangin an thleng duh lo a, kan thleng nasat lutuk chuan pawisa thir virvelah inbuk tawk lo a awm theih avangin a na zawng chu kan thleng duh lo a ni,” an ti bawk.

Mizoram Rural Bank Manager pakhat chuan Rs. 10 thir an thleng duhlohna chhan chu 'A dahna an neih loh vang' niin a sawi a. “Pawisa hi hman kual tur a ni a, dawrkai, sumdawng leh mipui te hian pe chhuak kual zel ila harsatna hi a awm lo ang,” tiin Zalen palai a hrilh.

Aizawl veng pakhata dawrkai chuan mipui lamin an dawn duh loh avangin an tan Rs.10 thir dawn chu a buaithlak a, chuvangin an dawng duh lo niin a sawi a, tunah pawh dahthat engemaw zat an la nei niin a sawi bawk. City Bus Conductor pakhat pawhin cheng 10 thir chu mipui lamin an dawn duhloh avangin anni pawhin an dawng lo niin a sawi bawk.

Rs. 10 thir hi Mizoram tih loh ah chuan hman harsatna a awm lemlo niin an sawi a. Hetih lai hian pawisa thir dang te chu a hmanna lamah harsatna a awm lo thung.