Mini ATM - Awlsamna leh Eizawnna tha thenkhat tan eizawnna tha tak a ni dawn a, mi tam tak tan awlsamna a ni dawn a, retailer nih tum pakhat phei chuan a pawisa tam thamah chuan anmahni dawrtu pan mai pawh a hnial loh tur thu an sawi hial a, I in chhung ngeiah ATM i hmang mai thei dawn te pawh a tih theih ang. Hei hi tunlaia Mizoram hmun hrang hranga awlsam zawka pawisa lakchhuah theihna tur khawl, Mini ATM an tih mai kalphung tur chu a ni.

“Pawisa lak i tum a, ATM a lo tha lo emaw, pawisa a awm lo emaw avangin buaina i nei thin em?” Tunah chuan hei hi pumpelh theih a ni tawh dawn, retailer hmel hriat i nei a nih ngat phei chuan a awlsam leh zual dawn. Tin, he Mini ATM retailer tan pawh sum hloh awm miah lova eizawnna tha tak a nih tel rualin khawtlang tana rawngbawlna a ni tel ang.

Ram hmasawn zelah sawrkar hnathawkte mai bakah private company-a thawk te thla bi hlawh hi an bank account kaltlanga pek an ni deuh vek tawh a, chuvangin an thla hlawh hi ATM card hmangin ATM booth-ah an la chhuak tawh mai thin. Hetiang vang hian khawchhunga ATM booth te thla tir lamah phei chuan a lun êm êm reng a, pawisa lâk chhuah tum tan rei tak tak intlar a ngai thin a, heng booth-ah te hian pawisa awm loh piah lamah khawl chhiat a tam em em. ATM booth te hian mipuite mamawhna a phuhruk pha lo tih ngam a ni a, Mini ATM hian i harsatna thui tak a chhawk mai piah lamah ATM pangngai atanga i sum sen belh chuang si lovin mi tam tak tan sum lakluhna i siam thei dawn a ni.

He pawisa khawl hi hetiang lam buaipuitu (digital financial facilitation service provider) ‘RNFI Services Private Limited’ chuan a rawn duan chhuah niin, ICICI Bank, Bank of India, Airtel Payment Bank, PayTM Payment Bank leh Fino Payment Bank te thawhpui (business correspondence) an ni a, he Mini ATM hi chu eng bank dawr tan pawha hman theih a ni thung. Kan thenawm state Assam leh India hmarchhak state-ah te bakah India ram hmun tam takah he khawl hi an hmang tawh.

Mini ATM hmang tur hian thil hranpa teh vak a ngai lo a, he khawl kawl (recognised retailer) hnênah i ATM card (debit card) kha a khawlah hian i hrut (swipe) ang a, chumi hnuah i ATM pin number kha i chhu lût ang a, i pawisa lâk chhuah duh zât chu retailer-in a pawisa atangin a pe mai dawn che a ni.

ATM booth-a pawisa i lâk ang thovin, pawisa i lâk chhuah rualin i mobile number ah SMS i dawng nghâl ang. Darkar 24 chhunga i pawisa lâk theih zat chu i ATM card-in a tih theih ang kha a ni mai bawk. Pawisa lâk chhuah nan chauh lo pawh balance en nan bakah ticket booking, payment hrang hrang atan pawh a hman theih a. Retailer te hian hemi portal hmang hian customer te insurance chi hrang hrang an tihsak thei leh zel bawk.

Tunlai khawvel, engkim mai awlsam taka tih zung zung tawhnaah hian ATM booth-a intlar nana hun khawhral hi mi tinin kan ui vek. Chuvangin Mini ATM hi a lar chho zel dawn tih a chiang reng mai! Hetiang a nih lai hian Bank lamin ATM booth an dah ve lohna khuaah hlei hlei a tangkai dawn tih a chiang a, Aadhar Card a hman theih leh zel hi a danglamna a ni. He khawl hi a kawltu an tam poh leh mipui tan thil a awlsam leh zual dawn tihna a ni a, veng chhung dawr te pawhin an kawl mai theih tur a nih avangin thenawm khawveng tan chuan chhawr nahawm tak tur a ni.