Kumin April thla tir lam atang khan Mizoramah khua a lum tan a, kum dang aiin khua hi a la lum chuang lo. Science & Technology department chhinchhiah danin kumina khaw lum ni berte chu April 16, 18, 19-te kha niin heng nia khaw lum lam chu 33°C an ni a, data atang chuan kum dang aiin a la lum lem lo a ni.

Hetih lai hian nikum lam khan khaw lum lam hi 33°C a kai lo a, chawhrualin nikum ai khan kumin April thla hi a lum zawk nia hriat a ni.

Directorate of Science & Technology hnuaia State Meteorological Centre chhinchhiah danin kumin bikah April 9 atang khan khua hi a lum chho tan a, Aizawlah chuan 30°C a kai chho tan a. Mahse, a karah ruah a tlak avangin khaw lum hi a ziaawm chho leh a, vawiin thlenga khaw lum lam hian 33°C a la pel lo nia hriat a ni.

Chhinchhiah atanga a lan danin kum 1985 atanga 2023 thlenga khaw lum ber kum chu kum 2017 kha niin, hemi kum April 13 khan 36.5°C  a kai a, hei hi Mizorama khaw lum ber ni a ni.

Khawvelah kum telin khua a lum chho hret hret a, hei hian Mizoram pawh nghawng chhovin khua a lum bakah sik leh sa pawhin awmzia a nei lo chho tial tial niin an sawi a. Ruah tui tlak hun pawh a danglam chho hret hretin fur pawh a tlai hret hret niin mi thiamte chuan an sawi a ni. 

Khaw lum kan tih hian a lum laia a san vang (maximum tempareture) ngawt khan khua a tilum lo a, a hniam lai ber (minimum tempareture) a san khan khua a lum ta thin niin mi thiamte chuan ZALEN an hrilh a ni.

Mizoramah khua lum thin bawk mah se hmun dang, phai ramte aia kan vanneihna chu thlifim kan dawng thin hi a ni a. Khua a lum ti bawk thin mah ila thlifim a thawt chuan kan dai sawng sawng mai a, chu mai bakah zan lamah chuan khaw lum hi a ziaawm chhoh mai thin avangin hmun dangte ngaihtuah chuan Mizoram boruak hi a la nuam hle niin mi thiamte chuan an sawi a. Phai ramah te chuan thli lum a tleh a, intihdaihna tur hmanrua air condition leh thil dangte neih loh phei chuan khaw lum tawrh hi a rapthlak hle a. Kum tin mi eng emaw zatin an boral phah thin hial a ni.

Mihringten kan chenna leilung kan tihchereu zel avang leh min vawng daitu ramngawte kan thiah zel avangin kum tin khaw lum hian zual lam a pan zel dawn tih mi thiamte chuan an sawi a. Nakin lawkah chuan tuihnate a la kang ang a, tui harsatna hian khawvel hi a la tibuai dawn niin an ngai bawk.

Khaw lum zel avangin India rama 90% chuan harsatna lian tak an la tawk thei dawn niin mi thiamte chuan an ngai bawk.