Khawvela infiammi hrang hrang khawmpui lian ber Olympic hnuhnung ber Brazil khawpui Rio de Janeiro-a nghah a nih tum khan infiamna chi hrang hrang 28 hmangin khawvela ram hrang infiammite an in el a. Thla thar mai hian Aizawlah Mizoram chhunga constituency (MLA bial) te inelna tur Mizoram State Games chu nghah a ni dawn a, hetah hi chuan sports discipline chi hrang hrang 32 zet hmangin inel a ni ang. Indigenous Game hi a huang anga dah lovin a chi hrang anga dah chu ni phei se la chu inelna chi 42 hmangin inelna hi neih a ni dawn pawh a tih theih.

Mizoram pum huap inelna hi tum 7 buatsaih ni tawhin tun tum hi a vawi 8-na tur ang a ni a, a hmasa ber chu 1963-ah tan niin 1st Mizoram District Olympic-1963 tiin inelna chi sarih hmangin intihsiakna neih a ni a, hemi tum hian Aizawl Town chu point hmu hnem ber an ni. 2nd Mizo District Olympic hi 1965-ah neih leh niin inelna chi hrang pasarih hmang bawkin inelna neih a ni a, hemi tum hian Aizawl South-in point an hmu sang ber.

1973 khan Mizoram State Games chu neih leh niin, buai lai a nih avangin Aizawl huam chhung bial thum chauhin inelna an hmachhawn a, Aizawl Central chu pakhatna niin Aizawl South chu pahnihna an ni a, Aizawl North chu pathumna an ni. Mizoram Olympiad 1977 chu Athletics leh Inbuan hmangin neih leh a ni a, hemi tum hian Lungdar chuan point an hmu hnem ber.

Mizoram State Games chu 1981 khan neih leh a ni a, hemi tum hian Inelna chi 12 hmang in intihsiakna neih a ni a, hemi tum hian Champhai chu a pum puia titha ber an ni. 1985 khan neih chhunzawm leh niin hemi tum hian inelna 12 a awm a, hemi tum hian Champhai chu pakhatna a puan an ni hman a; mahse, a hnuah Aizawl East chu puan an ni leh ta zawk a, hemi tum inelna hian sawi zui pawh a hlawh hle.

2006 khan Mizoram State Sports Council hnuaia Asssocition hrang hrangte chuan a rualin inelna an buatsaih a, hei hi 1st Mizoram Sports Festival tiin a hming puttir a ni a, hemi tum hi chuan a pum puia champion puan a ni lo.

Heng infiamna kutpui kan lo hman tawh ho zingah hian State Games tih hming kan puttir tawhte an lo awm tawh chungin a nihna takah chuan tum tum 3rd Mizoram State Games kan neih tur hi state puitling kan nih hnua a hmasa ber tur a ni thung. UT hun laia Sate Games kan buatsaih laia a kalphung bawkin tun hi constituency inelna a ni dawn. Discipline chi hrang 32 hnuaiah hian mipa bik inelna 132 a awm ang a, hmeichhe inelna bik 88 awmin a vaiin inelna chi 221 a awm dawn tihna a ni.

He intihsiaknaah hian nuai 150 chu ruahman a ni phawt a, constituency tin hnenah sing nga theuh pek an ni tawh. Player tel te reng reng hi an kal man leh an tel man (TA/DA) pek vek an ni dawn a, an rawn kalna a zirin an kal man erawh a inang lo thung ang. Beisei anga inelna huang tinah bial tinin player an tel kim tir theih chuan infiammi 15120 zet an inlan dawn a, a buaipuitu lam nen phei chuan mi sing hnih dawn ten mawhphurhna an la dawn a ni.

MLA bial, a bikin Aizawl huam chhung bik te phei chuan an sum hman tur peipung tur hian hma pawh an la nasa hle a, an player chhawpchhuah tur te tan an tang hle hlawm. Inelna hrang hrang-ah hian bial aiawh tur hi pakhat zel an nih dawn avangin tun tum hi chu a tha ber ber te inelna tur pawh a tih theih ang.