Mizo pi leh pute khan savuna thuziak an nei thin a; mahse, chu chu uiin a eisak niin an sawi a, finfiah erawh a har hle.

Mizoten A, Aw, B kan neih leh min siamsaktu chu sap missionary-te kha an ni a, kum 1894 khan Pu Buanga (JH Lorrain) leh Sap Upa (FW Savidge) te chuan min siamsak a ni.

Pu Buanga hian April 2, 1894 khan sikul a hawng a, zir hmasa ber chu Suaka leh Thangphunga te niin an pahnih hi Mizote zinga a aw b zir thiam hmasa ber an ni.

A tira Pu Buanga leh Sap Upa te alphabet siam chu kum 1898-ah Zosapthara lo chhuak ve lehin a that tawk lohna a rawn hmu a, chuan Ng a belh ta a, g leh j te pawh hmanna kan nei lo tih hre chungin Pu Buanga te lo telh chu paih chuang lovin a hmang ve ta zel a. Zosapthara duan hawrawp 25 chu a lo chhuak ta a, hei hi tun thlengin kan hmang zui ta niin mi thiamte chuan an sawi.

Mizote hi tunhma deuh kha chuan lehkha chhiar taima tak mai hnam kan ni thin a. Lehkhabu dahkhawmna in, ‘Library’ pawh kan ngahin khaw hrang hrangah tlawmngaiten library tha leh changtlung tak tak an nei thluah a, mipuiten an tangkaipui hle thin a. Mahse, tun hnai hun eng emaw atang khan lehkha chhiar kan thatchhe ta hle mai a, hmun hrang hranga library-te chuan tlawhtu an nei tlem sawt ta hle a. Hei hi a chhan ber chu social media vang nia hriat a ni.

Mizoramah kum 1969 khan a hmasa ber atan library kan nei tan a. Assam sawrkar hnuaia kan awm laiin tun a Aizawl District Library ni ta hi Sub-Divisional Library angin 1969 khan din a ni.

Tun dinhmunah Mizoramah sawrkar hnuaiah library panga a awm a, chungte chu Mizoram State Library, Kolasib District Library, Lunglei District Library, Champhai District Library leh Aizawl District Library te an ni a. Siaha District Library awm bawk a, anni erawh hi chu MADC hnuaiah an function tawh a, state sawrkarin a enkawl lo thung.

Heng bakah hian tlawmngai pawlte enkawl library 511 an awm bawk a. Mizorama zirna in sang, Mizoram University library-ah lehkhabu nuai 1.2 vel a awm mek a, an lehkhabu neihte hi India hmarchhaka university-ah chuan a tha ber pawl a ni.

ZALEN zawhna chhangin library mi thiamte chuan library chu hriatna hnar, zirlai leh mipui vantlang tana zirna in tha ber, ‘People’s University’ tih a nih angin a hmang tangkai apiang tan hlawhtlinna bulpui a ni tih an sawi a. Mahse, heti chung hian a tangkaina leh pawimawhna kan hriat tawk loh avangin kan chhawr tangkai nep hle niin an sawi a. Hna zawng mek te, exam tuma inbuatsaih leh mimir hian library hi hmang tangkai lehzual thei se an duh tih ZALEN an hrilh bawk.