Election Commission of India in MLA inthlannaa hman tur electoral roll aiin kan hma lawka Local Council inthlanna neih tur State Election Commission in roll a siamah voters 2205 in an tlem zawk.

Tunhnaia tihchhuah tak Local Council electoral roll 2020 ah hian MLA roll/ Draft roll aiin voters 2205 in an tlem zawk a. Draft roll ah hian voters 220963 an awm laiin final roll (LC Roll) ah hian voters 218758 an awm a, heng te hi mipa 101721 leh hmeichhia 117037 te an ni. MLA roll aia Local Council roll-a voters an tlem chhan hi hnamdang paih an nih vang niin thuneitute chuan an sawi.

Election buaipui- tute chuan, "MLA roll ah kha chuan Mizorama cheng nghet hnamdang te pawh thun an ni a, mahse Local/Village Council inthlan hi chu ram leilung fate tan chauh thlan theih anih avangin MLA roll a awm hnamdang engemaw zat chu paih an ni a. Hnamdang tan tel ve a remchan loh avangin mi thahnem tak paih an ni," an ti. Local Council roll ah hian draft roll (MLA roll) aiin final roll ah hian in awm zat pawh 168 in a tlem zawk bawk a, draft roll ah in 69865 a awm laiin final roll ah chuan in 69697 a awm thung a. In awm zat a tlem chhan pawh hnamdang paih an nih avang leh hmun thenkhatah seat neih tam nana in awm zat aia tam report a awm nia a lan vang niin an sawi bawk.

Aizawl khawpui chhungah hian Local Council 83 awmin draft roll chu ni 13.3.2020 khan tarchhuah a ni a. Ni 18.3.2020 thleng roll a luh, paih leh siamthat dilna hun hawn a ni a. Dilna hun hawn chhung hian Inrinni leh Pathianni a awm avangin ni 3 emaw chauh mipuite tan hun hawn ang a ni a, hemi chhunga thil tifel hman lo an awm avang hian mi thenkhat sawisel a hlawh a. Mahse thuneitu lam atanga thuthar a awm a nih loh chuan LC inthlanna atan tuna roll tihchhuah thar hi hman a ni dawn a ni.

Local Council roll tihchhuah takah hian draft roll nen tehkhinin Falkland ah thunbelh thar an tam ber a, voters 146 thunbelh an ni a. Khatla vengah paih tam berin voters 294 paih an ni. Local Council zingah Zemabawk ah voters tam berin 7144 an awm a, Chite vengah voters tlem berin 460 an awm thung.

Aizawl district chhungah vek hian Village Council 67 a awm a, voters 59381 awmin heng zinga 29055 chu mipa an ni a, hmeichhia 30326 an awm bawk a. Sihphir ah voters tam berin 3173 an awm a, Chhanchhuahna Khawpui chu a tlemna ber niin voters 35 an awm bawk.