DOWNLOAD OUR APP

Read latest news on your phone
app-store

FEATURE : MLB buaipui mek

May 01, 2022

Mizo Language Development Board chairman leh member dang te chu ruat an nih chuan dan pangngai angin hna an thawk tan thei dawn a. Secretary erawh eng level tur nge tih leh eng service tur nge tih ah an la buai deuh thung a. Board a din theina atan hian larsapin bill a pawm atangin buaipui nghal a ni . Mizo Language Development Board chu Mizoram Board of School Education model ang deuha kal tur niin hriat a ni.

Mizo Language Development Board chairman leh member turte chu buaipui mek a ni a, hun remchang hmasa berah hnathawk thei tura buatsaih theih beisei a ni.

ZALEN-in Human Resource Development Board Vice Chairman L. Thangmawia hnen atanga thu a dawn danin Mizo Language Development Board chairman leh member dangte hi ruat an nih chuan dan pangngai angin hna an thawk tan thei dawn niin a sawi a. Secretary erawh eng level tur nge tih leh eng service tur nge tih ah an la buai deuh niin a sawi a. Board a din theina atan hian larsapin bill a pawm atangin buaipui nghal char char a ni tih a sawi bawk.

Mizo Language Development Board chu Mizoram Board of School Education model ang deuha kal tur a ni tih sawiin secretary tur chu eng pay level leh eng service tur nge, a ngheta thawk tur nge deputation a dah tur tihah sawrkar chuan thutlukna a la siam lo nia thudawn a ni.

Mizo tawng lama thuneitu sang tura duan, Mizo Language Development Board hi din a nih theihna atan mi thahnemngaiten theihtawp an chhuah a, hetia din a ni ta hi Mizo Academy of Letters leh pawl hrang hrangte chuan lawmawm an tih thu an sawi a, a taka a chan theih hun leh hna a thawh theih hun an nghakhlel hle niin an sawi.

ZALEN thudawn danin Mizo Language Development Board hian Mizo tawnga thumal awm lo chi hrang hrangte Mizo tawnga dah mai bakah Mizo tawng hmasawn zelna leh than zelna atan hma a la dawn a ni. 

Thudawn danin Mizo Language Development Board office tur hi zawn mek a niin Mizoram Youth Commission office hlui chu hman tum a ni a, hun remchang hmasa berah chei that tum a ni.    

Mizo Language Development Board bill hi March 10, 2022 khan Assembly House-ah pawm (pass) a ni a, March 15 khan he bill pawm tak hi larsapin a pawm leh a ni.

Share now