Rotary India Literacy Mission leh Vision Spring tangkawpte chuan tunlai hian India ram hmun hrang hrangah naupang mit tha lo, tarmit leina harsate tan a thawlin tarmit leisak tumin hma an la mek a, Mizoram bikah chuan December 15, 2021 thleng hun hawn a ni a, tunah hian an duhkhawp an la hmu lo nasa hle.

Mizoram bikah hian Rotary Club Literacy Mission chu a buaipuitu an ni a, anni hnenah hian naupang hming, kum leh School kalna certificate leh contact number te pek mai tur a ni a, hei bakah hian sorkar damdawiin-a an mit entirna lehkha, tarmit an prescribe-na thehluh tel a ngai. Phone  no 8794446336 leh 9436143505 , thanpuia81@gmail .com leh eileenl@rediffmail.com-ah te heng document hi thehluh theih a ni. 

Mizoram bikah hian quota mi 5,000 tan an pe a; mahse, tunah hian mi 100 bawr vel bakin dilna an la thehlut lo tih Rotary Club Literacy Mission Chair Rtn. Lalthanpuia chuan ZALEN a hrilh.

India ramah mi nuai khat hnenah pek tum a nih thu a sawi a, chutihrualin private school-a lut naupang tan erawh a dil theih loh a, sawrkar school, government aided school leh deficit school hoten an dil thei a, chumi awmzia chu kohhran school kan tih hova kalte pawhin an dil theih tihna a ni. 

He thil an kalpui dan chungchangah hian Rtn. Lalthanpuia chuan, “Vairam behchhana kalpui a ni ber mai. Phai lamah chuan private school-a kalte chu mi awm thei tawka ngaih an ni a, sawrkar sikul leh kohhran school-a kalte chu mi rethei tak tak an nih thin vang a ni. Private school-a kal te chu lei thei tura ngaih an ni,” a ti.

Tarmit dil thei chin hi kum 5-18 inkar an ni tur a ni a, an kum zat leh prescription neih ang thlap hi phai lamah thawn thlak a ni ang a, chumi mil chuan tarmit hi an lo siamsak ang a, chumi hnuah an kutah hlan a ni ang. Rotary Club-te chuan an beisei anga dil an tam loh avangin a dil theite chuan a rang lamin ngaihven se an duh tih ZALEN an hrilh.