ZALEN June 13, 2026 : Middle East buaina kal zelah sawrkar laipui chuan tuialhthei renchem turin ruahmanna a siam a. Chumi bawhzui nana chuan Mizoram sawrkar pawhin Nilaini apiang chu ‘No Official Vehicle Day’ atan a puang a, sawrkar hnathawkte pawh inkal chhawk tura tiin staff zinga 20% chu in lam atanga hna thawk turin ruahmanna a siam a ni.

Ruahmanna siam chhan hi sawrkarin tuialhthei a renchem zawkna atan leh vantlang lirthei tangkai zawka hman a nih theihna atan a ni a; mahse, sawrkar thupek hian zawm a hlawh lutuk loh bakah public transport-te an chhawr tangkai lem lo nia thudawn a ni.

Asia khawthlang ram buainain ziaawm lam a la pan thei lo a, hei vang hian khawvel pumah tuialhthei harsatna a thleng nasa a. Indona hian reh lam a la pan mai dawnin a lang lo a, tuialhthei man pawh a sang hret hret a, India-ah ngei pawh tum eng emaw zat tihsan a ni tawh a ni.

Oil renchemna kal zelah hian sawrkar pisa hrang hrangah inkal chhawk niin hnathawkte chu hun bituk awmin pisa an kai a. He ruahmanna hi May thla tawp atanga hman tan niin sawrkar hnathawkte chu pawl hniha thenin pisa an kai hun siamsak an ni a, a kal chhuak hmasa ho zing dar 8:30-ah pisa an kai tan a, tlai dar 4:30-ah an bâng a, a tlai zawkte chuan chawhma dar 10:30 atangin pisa an kai a, tlai dar 6:30 ah an bâng thin.

Mizoram sawrkarin ruahmanna a siam dan chuan kar tin Nilaini chu sawrkar lirthei hman loh ni-ah puan a ni a, meeting chu video conferencing hmanga neih hram tur a ni a. Official-a zin chhuahna pawh a tul tawpkhawkah lo chuan tih loh tur a ni a, lirthei inzui duah duah pawh phal a ni lo.

Sawrkar lirthei tlan loh ni siam chungchangah hian officer pakhat chuan lirthei a neih tho avangin harsatna a tawk lo tih a sawi a. Online meeting leh e-file chungchangah erawh harsatna a awm tih sawiin, “Pisa kan kai loh nia meeting a awm hian online atang chuan a buaithlakna chin a tam khawp mai a, eng emaw hriat belh duh emaw, zawh fiah duh neih pawhin staff-te biak a ngai thin a, staff-te hian e-file an khawih ve bawk si lo. Hei bakah pisa inkai chhawk chungchangah kan staff zingah, a bikin peon-te an chawlhin a buaithlak thin khawp mai,” a ti.

Officer dang leh pakhat pawhin lirthei chungchangah chuan mi dang lirthei behna tur a awm theih mai thin avangin harsatna an tawk lem lo tih a sawi a, e-file pawh an la kalpui ve loh avangin harsatna an tawk lem lo niin ZALEN a hrilh bawk.

Sawrkarin No Official Vehicle Day a puan chhan ber nia lang chu tuialhthei hman tihtlem leh public transport hman tangkai a ni a; mahse, heti chung hian public transport chu hman tangkai a ni lem lo nia thudawn a ni.

ZALEN-in bus leh taxi khalhtute a kawmnaah sawrkarin lirthei tlan loh ni a siam vangin passenger an ngah phah lem lo niin an sawi a. No Official Vehicle Day an chhawr tangkai leh tangkai loh zawhna chhangin city bus conductor pakhat chuan, “Aizawl khawpuiah hian ni tin city bus service hi 100 vel kan awm a, sawrkar lirthei tlan loh ni hian kan tawt phahna pawh ka hre chuang lo, ni dang ang tho a ni,” a ti.

Taxi driver hrang hrang a biaknaah, "Nilaini a nih avanga passenger kan ngah phahna kan hre chuang lo a. Sawrkar lirthei kawl thei chin hi chu officer liante an ni a, anmahni pawhin lirthei hi an neih tho bakah an chhungte an inthlahtir thei a. Intlanchhawk chhawrtu ber chu driver-te niin kan hria, a chhan chu an chawlh theih vangin a ni,” an ti.

Hmun hrang hranga two wheeler taxi khalhtute ZALEN-in a kawmnaah pawh ni dang aia Nilainiah passenger an ngah phah an hriat lem loh thu an sawi a, ni dang aiin traffic a thawl deuh zawk nia an hriat thu an sawi thung.

Hetih lai hian pa pakhat chuan Mizoram chu India ram dangte nen tehkhin theih a ni lo nia a hriat thu a sawi a. “Phai lamah chuan mihring leh lirthei an tam a, office kal nan pawh public transport rinrawlah a neih theih a. Mizoramah erawh chuan public transport hi a la mumal tawk lo deuh a, phai lam nena khairual ngawt chu a tihchi loh deuhvin ka hria,” tiin a sawi ve bawk.