Mizoram-ah hian tualto pangpar eng emaw zat an awm a, chung zingah chuan dingdi, artukkhuan, chhawkhlei, chuailo, hnahsin, di suak, fartuah, kumtluang, kungpuimuthi, nuaithang, rimenhawih, sap pangpar leh zamzo te hi a lar zualte chu an ni awm e. Heng bakah hian pangpar eng emaw zat chu state pawn atanga lak luh a ni a, pangpar avanga eizawnna nei Mizo zingah an tam ta hle.

Pangpar hmanga eizawng hi a then chu pangpar chingte an ni a, a then chu a zuarte niin hunpui leh eng emaw bika mi in leh a vel cheia eizawng pawh an thehnem hle.

Inneih nikhuaa biak in leh mo cheitute pawhin an hlawkpui hle a, henga cheitu zingah hian mipa an thahnem hle bawk.

Pangpar Zuar Association President C.Lalthakima chuan Mizoramah pangpar zuara eizawng an tamin an hlawkpui hle niin ZALEN a hrilh a. An pawl member-te chuan Mizoram chhunga pangpar leh plant (thing) an zawrh bakah state pawnah pawh eng emaw zat chu an zuar chhuak thin niin a sawi a. State pawn atanga an lak luh zingah palm tree, far (pine), fiddle tree leh ZZ plant te chu hralh kal zualte an ni tih sawiin state pawna an hralh zingah saron, anthurium leh rose te an ni tlangpui tih a sawi a. Pangparte hi a tlangpuiin Assam, Tripura, West Bengal leh Tamil Nadu lamah te an hralh niin a sawi bawk.

C.Lalthakima chuan an pawl chuan an din tirh, kum 2017 atangin harsatna bik a awm a nih loh chuan kum tin fair hi tum li an nei deuh ziah tih ZALEN a hrilh bawk.

Fair hi a tlangpuiin thla thum danah neiin February, May, August leh November-ah te an nei tih a sawi a. An hlawkpui thei hle tih sawi bawkin nuai 20 chuangte tum khatah an hralh niin a sawi.

Fair an neihna hmunah hian member zingah engmah inthliarna awm lovin seat an rin pawp pawp a, number pawtin an seat number pawhna hmunah an thu zel niin an sawi bawk.

Mizoram pawn atanga pangpar lak luhte a nung tha duh lo nia sawi chungchangah Pangpar Zuar Association hruaitute chuan pangpar nun that duh loh chhan chu enkawl that tawk loh vang niin an sawi.

“Pangparte hi uluk leh duat taka enkawl an ngai a, chubakah tui pek that a pawimawh hle. Hetia duat taka enkawl chuan a thi an tlem hle a ni,” tiin state pawn atanga pangpar la lut thin nu pakhat chuan an sawi.

Pangpar zingah a season azirin an hralh dan a inang lo nia sawiin a tlangpuiin September atanga June thla inkar chu pangpar par vul zual lai (blooming season) niin an sawi bawk.