Khawvel hripui leng Corona virus avangin mi sing tel an thi tawh a, hri kai ringawt pawh nuai tel an tling ta. Hripui hian khawvel a chawkbuai a, India ram economy nasa takin a nghawng a. Mizoram pawhin kan tuar nasa hle a, chung zingah chuan lirtheia eizawng te hi a tuar langsar zinga mi an ni awm e.

Mizoram sawrkar chuan lockdown inkaihhruaina chu tlema thlah dulin lockdown 4.0 ah chuan mihring phur leithei te chu an service a phal a. Mahse Aizawl khawpui lut tur te chu number kawpkim leh kawpkimlo in then an ni a, number kawpkimlo te chu Thawhtan, Nilai leh Zirtawpni ah te an service thei a, number kawpkim te chu Thawhleh, Ningani leh Inrinni ah an service thei thung. Sawrkarin passenger phur lirthei te an service phal tawh mahse ni dang ai chuan service an la tlem hle.

Aizawl City Bus ah chuan an seat neih zat phurh phal a ni a, ni danga seat inkara dintir thin chu phal a ni lo. Mahse heti chung hian mipui pawn chhuak an la tlem avangin bus te hi an thawl thei hle a, hei mai bakah service pawh ni dang aiin an tlem a. Tun dinhmunah Aizawl khawpui ah bus 40 vel an tlan thin niin an sawi.

Taxi ah pawh a hmaa passenger a zatve (2) chauh phurh theih kha tunah chuan a leng thei zat (4) phurh phal a ni tawh a. Anni pawh hi number kawpkim leh kawpkimlo in an tlan thin. Taxi driver pakhat chuan mihring veivak an la tlem avangin ni dang aiin sum an hmu tlem zawk niin a sawi.

Khaw kar kawnga service thin Maxi cab (Sumo) tlan pawh ni dang ai chuan an tlem hle a. Maxi cab counter nghaktu 1 chuan mipui in hrileng an hlauh avang leh zin an hreh avangin lirthei service hi a tlem niin a sawi a. Khualzin te pawh ni danga khawilai hotel emawa chaw ei thin ang kha ni tawh lovin thenkhat chuan chaw funin hmun remchang laiah an ei a. Hotel thenkhat chuan pack in an pe chhuak bawk a, ni danga chaw ei dur dur ang kha chu a awm tawh lo a ni. Maxi cab hi Mizoram chhungah service phal ni mahse state danga service thin chu phal a la ni lo thung.

Aizawl khawpuia veivak thin two wheeler taxi te pawhin ni dang aiin passenger an nei tlem zawk tih an sawi a. Taxi driver 1 chuan, "Mihring veivak an tlem avangin tlanna a tlem a, kan sum lakluh pawh ni dang kan pha lo hle," tiin Zalen a hrilh. Two wheeler khalh thin pakhat chuan ni danga regular taka nitin mi 250 vel service thin kha tunah chuan 100 bawr vel chauh an service niin a sawi a.Two wheeler nei zingah pawh service ngam lo te, thingtlang lama driver haw te an tam avangin ni dang aiin service hi an tlem hle niin a sawi bawk.