Aizawl khawpui chu tih changkan a, khawpui mawi leh 'smart' zawka chei chhoh mek zel a ni a. Aizawl Smart City Ltd. hmalakna kal zelah mipui ke a kalte leh lirthei khalhtu ten him leh mumal taka kawng an hman theihna turin Aizawl khawpui hmun 10-ah traffic light hmanga kawng kanna Pelican Crossing System bun a ni. Pelican crossing hi tha viau mah se, Aizawl khawpui tan hian a tul ber em tih chu mi tam tak ngaihdan a ni.

Police Officer pakhat chuan pelican crossing hian a hma aiin lirthei chevel control kawngah a ti muang zawk mah nia a hriat thu a sawi a. "A hmaa manual hmanga lirthei kan control khan a rang zawk mahin ka hria a. Mizoram chu phai kawng ang a ni lo a, chuvangin traffic light hmang lo hian Traffic Police te hi phar zawk se lirthei chevel control a awl zawk mahin ka hria a ni," a ti. Lirthei khalhtu pakhat chuan light awmna chu a san avangin light signal hmu tur chuan hla deuh hleka din a ngai a, chu chuan harsatna a siam niin a sawi a. Light awmna hnaia din chuan hmuh a harsa niin a sawi bawk.

Pa pakhat pawhin pelican crossing chu tha tho mah se, tuna hmun 10 em ema siam nghal chu fuh lo a tih thu a sawi a. "Kan driver te phai lama an kal huna an bo lutuk loh nan leh kan khawpui cheitu atan traffic light hmanga kawng kanna Pelican Crossing hi chu neih ve tha ka ti a. Mahse a tira hmun 10 han enchhin nghal tawp hi chu a fuh lo hlein ka hria a, khawi laiah emaw hmun 1 ah siam phawt ni se tha ka ti a. Chubakah tlangram kan ni a, kan kawngpui te a lian lo bawk nen thil tul ber a ni em aw ka ti bawk a ni," tiin Zalen a hrilh.

Aizawl Smart City Ltd. chuan traffic light hmanga kawng kanna (Pelican Crossing System) hi Chanmari West ah 1, Zarkawt 2, Millennium Centre 1, Civil Hospital 1, AR ground gate 1, Treasury Square 2, Israel point 1 leh Police station, Babutlang ah 1 te bun fel a ni.

Pelican Crossing ah hian traffic light hmangin lirthei leh mipui kea kalte awmdan tur kawhhmuh a ni a, power (electric) hmanga tihen ngai a ni a, eng hman man hi tunge pe dawn tih ah pawh harsatna a awm nia hriat a ni.