Aizawl Municipal Corporation (AMC) chuan National Green Tribunal leh Ministry of Housing & Urban Affairs in Smart city atana a puan khawpui zawng zawng te chu October ni 2,2019 ah chuan 'Plastic free city' ah puang vek turin a hriattir a. He hmalakna bawhzuiin AMC chuan August ni 1,2019 atangin Aizawl khawpui chu Plastic free city ah a puang a, mahse zawm a hlawh tawk lo hle.

AMC chuan Plastic free city a Aizawl khawpui a puan hi theihtawpin an bawhzui a, khawpui daiah te duty insiamin Aizawl ah plastic lam chi micron 50 hnuailam te chu khap anih thu khualzin te hrilhin bazar leh sumdawnna hmun thenkhata polythene te chu an man khawm a. School leh hmun remchang laiah te awareness neiin a hlauhawmzia inzirtirna kalpui reng a ni a. Hriattheih chinah plastic micron 50 tling lo hi kgs 1003 an man tawh a ni.

AMC in kum 2016-17 a plastic leh thermoplastic zirchianna an neih ah chuan dawrkai ten thla khat chhungin polythene khaina awm chi kg 8500.53 leh khaina awm lo chi kg 2824.87 an ti ral a. Dawr 2408 atanga chhutin 98.4% in a thlawnin anmahni dawrtu te hi polythene an pe a, 1.57% chauhin an hralh a ni. Plastic hlauhawmzia inzirtirna leh chharfai hnatlang chu AMC huaihawtin June ni 7,2019 khan neih a ni a, hriattheih chinah hnatlangah hian mi 72120 an thawkchhuak a, tum khata hnatlang thawkchhuak an tam ber tum nia hriat a ni.

AMC hian theih tawp in plastic khap hna hi kalpui mahse mipui ten an zawm tha tawk lo hle a, bazar leh dawr tam takah polythene hi hman mek a la ni. Sumdawng pakhat chuan polythene chu hun rei tak an lo hman tawh avang te, a awlsam em avang leh a man a tlawm bawk avangin an hmang zui zel niin a sawi a. Tuna polythene thlakna atana mi thenkhat ten an siam chu a tlo loh avang leh a man a to avangin an tan a buaithlak niin a sawi.

Hetih lai hian AMC hmalakna hian nitin thlawptu a neih belh zel a, tun dinhmunah hlawhtling nghal vut vut lo mahse mipuiten plastic thatlohzia an hriat chhoh zel avangin nakin lawkah chuan Aizawl khawpui hi Plastic free city a la nih ngei a rin thu pa pakhat chuan Zalen a hrilh.