Sawrkar laipuiin mipuite tana insurance scheme a siam PMJJBY leh PMSBY-ah te hamthatna dawng thei turin Mizoram mipui 23,509 an inziak lut tawh.

Zalen thudawn danin sawrkar laipui scheme eng emaw vanduaina tawh palha thihna hial a thlena lu man nuai 2 thleng dawn theihna Pradhan Mantri Jeevan Jyoti Bima Yojana (PMJJBY)-ah hian March ni 31,2020 thleng khan Mizoram mi leh sa 7559 an inziak lut tawh a, he scheme chhawr tangkai tur hian kum khatah premium Rs. 330 pek a ngai a, Bank account neite chu an account atangin a premium hi lak (cut) mai thin a ni. PMJJBY hnuaiah hian insurance ti te chu eng vang pawhin thi se luman nuai 2 thleng an la thei a, he scheme hian kum khat chhung a huam a, June 1 atanga intanin May 31 thleng a huam (cover) a ni.

Vanduaina tawh palha zangnadawmna dawn theihna Pradhan Mantri Suraksha Bima Yojana (PMSBY) hnuaiah hian inziak lut mi 15,950 an awm a, kum khata Rs. 12 premium pein vanduaina tawh palha thihna a thlenin nuai 2 thleng hmuh theih a ni a, piansualna a thlenin nuai 1 thleng hmuh theih a ni bawk. He scheme pawh hi June 1 atanga May 31 inkar chhung a huam a ni.

Bank Manager pakhat chuan Pradhan Mantri Jeevan Jyoti Bima Yojana (PMJJBY) leh Pradhan Mantri Suraksha Bima Yojana (PMSBY) te chu mipui ten chhawr tangkai se a duh tih Zalen a hrilh a. “Heng scheme te hi mipuite tan a tha a, eng emaw vanduaina tawh palhah sum tam tak hmuh let theih a ni a. Premium pek tur hi a tlem a, eng emaw vanduaina kan tawk palh anih pawhin a pahnih hian hman kawp theih a ni a. Kan chhawr tangkai lo anih chuan a lawmawm lam zawk a ni a; chuvangin, mipui a tam thei ang berin ngaihven se ka duh khawp mai,” a ti a.

Heng scheme chhawr tangkai hi Mizoramah pawh mi eng emaw zat an awm tawh niin a sawi bawk.

Social security scheme hnuaiah hian zero balance hmanga acoount hawnna Pradhan Mantri Jan Dhan Yojana (PMJDY) ah mi 7694 in account an hawng tawh a. Pension-te tana account hawnna Atal Pension Yojana (APY) hnuaiah mi 526-in account an hawng tawh bawk.