China ram atanga hri intan Covid 19 chu vawiin thlengin khawvel buaipui a la ni chho zel a. Hri avangin ram danga awm ten mahni khua an pan a, chung mite chu hri an vei leh vei loh enfiah thin an niin a bika khunghranna tura ruahman ah khung 'Quarantine' an ni thin. Hetia khunghran hian harsatna a chhawk nghal mai lova, an ei leh in ningnawi bawlhhlawh chu buaipui tham a tling ta hial mai. Heng bawlhhlawh te hi bawlhhlawh paih motor pangngai a paih mai mai a rem lo a, a bika ruahmanna siam ngai leh mi nazawngin an khawih hreh anih avanga harsatna hi thleng a ni.

Aizawl veng pakhata Local Task Force hruaitu zinga mi chuan quarantine te bawlhhlawh paih chungchangah harsatna an tawk nasa niin a sawi a. "Kan vengah hian quarantine centre 5 leh in lam in khunghrang te kan nei a. Heng mite hi an chhuah kan phalloh avangin bawlhhlawh pawh an awmna hmunah an dah/khawl mai a ngai a, bawlhhlawh paih motor pangngai ah an bawlhhlawh te hi paih a rem ve si lova. Mi thenkhat bawlhhlawh chu a rei deuh tawh avangin a lung te hial a awm a, kan mangan pui khawp mai," a ti.

Aizawl khawpuia bawlhhlawh paih motor neitu pakhat chuan Covid 19 chu natna inkaichhawn awl tak anih avangin quarantine lai te bawlhhlawh khawih palh an hlau hle niin Zalen a hrilh a. "Khunghran mek te bawlhhlawh hi a hriathran loh avangin kan hriat lohin an bawlhhlawh hi bawlhhlawh pangngai phur motor ah hian lo paih palh ta se kan tan hian a him lo thei hle dawn a. Chumai bakah hmun hrang hranga kal thin kan nih avang hian natna pudarhtu kan ni thei dawn a, theih tawpa fimkhur turin kan inchah ve thin a ni," a ti. Tun dinhmunah Aizawl khawpui ah bawlhhlawh phur motor 150 vel a awm nia an hriat thu sawiin mipuite chu a bika paih tura AMC in a ruahman motor ah chauh quarantine lai te bawlhhlawh paih thin turin an ngen tih a sawi bawk.

Aizawl Municipal Corporation (AMC) thawktute chuan lirthei indaihloh vangin duh angin quarantine mek te bawlhhlawh chu an paih chak thei lo niin an sawi. Zalen hnenah AMC thawktu te chuan, "Aizawl khawpui ah hian quarantine centre 200 chuang a awm a, tunah hian kan neih sa department motor 6 bakah motor dang 2 hire in a paih hna hi kan thawk a. Quarantine centre a tam bakah lak bawrh bawrh a theih loh avangin mipui duhdan kan phuhru thei lova, hrehawm kan ti hle a ni," an ti.

Quarantine bawlhhlawh te chu a bika sawngbawl an ni tih sawiin, "Aizawl bawlhhlawh paihna hluiah feet 12 a thukin lei kan laikhuar a, chumi hmun ah chauh chuan kan paih a. Bawlhhlawh te pawh kuta khawih lovin hydraulic motor hmang chauha paih a ni a, hei mai bakah lirthei chu a kah thianghlimna hmangin kah leh vek a ni a, a hautak duh khawp mai," an ti bawk. Khunghrante bawlhhlawh sawngbawl chu a hautak hle tih sawiin motor 1 ah thawktu 2 emaw zel tirh an ngaih bakah PPE hmanga thuam te an ngai a, sum sen pawh a hautak bik niin Zalen an hrilh.

Tun dinhmunah Aizawl khawpui bawlhhlawh hi nitin metric ton 190 vel paih anga chhut a ni.