Social media hriat chian dawn chuan traditional/print media leh broadcasting hi hriatthiam phawt a ngai a. Media chu midang/ mipui hnena thu kan hriattir duhte hriattirna hmanrua emaw dawhsan emaw a ni a. Print, broadcast and new media (internet) te hi media chi thum (3) ni mek te an ni a. Tunlaia kan buapui ber chu social media leh a pawikhawih hi a ni a, chung chu ‘new media’ internet hmangte an ni a, cxomputer leh phone-a hmanga khawih theih te an ni hlawm a. Websites, Social networking, video sharing, photo sharing, blogs, micro-blogs, virtual world, gaming te thlengin a huam.

Kum 1442 AD-ah Gutenberg chuan printing press a siam chhuak a daih tawh a, mahse kum 200 hnu 1600 vel atang khan weekly leh daily hmasa ber te chu an rawn intan ve chauh a. Hmanrua awm tawh mah se mass media atan hman thiam a la ni lawk lo a ni. Kum 300 hnuah daily paper phei chu mimirah a lar ve chauh a.

1921 a siamchhuah radio pawh mipui hman tlanglawn ni tur chuan kum 20 zet a ngai a, TV pawh 1927 ah siamchhuah ni daih tawh mahse USA?leh ramchangkanga chenna in tam zawk mawi tur chuan hian kum 35 vel zet a duh a ni. Mizoram phei chuan 1980 bawr velah kan hmelhriat tan chauh a nih kha.

Heng media te hi an rei tawh ‘filter system’ mumal zawk hman an ni a, reporter te’n an vawmkhawm hnuah desk editor leh editor te’n an theih angin an lipse a, an khal leh a, chumi hnua chhuah a nih avangin tihsual awm thin mahse a tam thei lo a ni.

Nikum khan Mizoramah media kaihhnawih thubuai 11 a lut a, a vaiin social media/IT atanga lut vek a ni a, media dang atangin police lam chuan thubuai ziah luh an nei lo. Social media kan la hman thiam tawk loh vang leh filter system hman that tawk loh vang a ni mahna.

Mizoram social media kan hman larte dinhmun hi khawvel huapin thlir thuak ila. Internet hi 1990 ah Tim Berners-Lee- an a hmuchhuak a, kan ramah chuan 1995 khan BSNL in a lalut a.

Kum 14 chhungin hmanraw awmsa chu mihringin hman tangkai a thiam hman a, social media te an rawn piang hlawm a, kum 15 chhungin khawvel micheng 50% min thlunzawm hman der a ni. Hetiang anga chak media hi khawvel in a la tawng ngai lo a ni.

2004 a siamchhuah Facebook hi an tld 2.5 hmangtu a nei a, Instagram hi 2010 a piangin tld 1 a tlin tawh a, Whatsapp pawh 2010 a siam niin tld 1.5, Youtube pawh 2005 ah tan a ni a, 2 tld in an hmang a ni. Whatsapp hmangtute 70% hian engtik lai pawhin an hmang reng niin thulakna chuan a tarlang a ni.