Mizoramah hriat theih chinah rubber ching chhungkaw 8,000 chuang an awm nia chhut a ni a, kum khata Mizoramin rubber a tharchhuah chu metric ton 1,460 nia chhut a ni.

Mizoram chu rubber thlaiin a ngeih tih hriat niin India rama rubber tharchhuak tam, Tripura thar zat tharchhuah tuma hmalak mek a ni a, Mizoram chhunga rubber chin theihna zawng zawngah chin tuma hmalak mek a ni.

Mizoramah hian rubber chin theihna hmun hectare 50,000 a awm anga ngaih a ni.

Mizoramah kum 2005 vel atang khan rubber chin tan a ni a. Intihhmuh chhoh zel niin December 28, 2022 khan Mizoram Rubber Society din a ni a, he pawl hian rubber board nen hma la hovin Mizorama rubber chingtute tan theihtawp an chhuah mek.

ZALEN zawhna chhangin Mizoram Rubber Society hruaitute chuan Mizoram chu rubber-in a ngeih avang leh a hralhna lamah buaina a awm ve loh avangin mipuiten ching uar se an duh tih an sawi a. “Mizoram boruak hi rubber hian a ngeih a, a bik takin hmun hniam leh lum lam hi a duh bawk a. Tih tak zeta kan beih chuan hahthlak deuh mah se a hlawk a, a hralhna lamah buaina a awm lo bawk a. Keimahnin phai lama kan hralh duh leh kan hralh thei a, kan huanah an rawn lei thei bawk nen, mipuite hian ching uar ila kan duh hle a ni,” an ti.

Rubber chingtu pakhat chuan rubber chu kg-ah Rs. 100 atanga Rs. 125 inkarin an hralh thin niin a sawi.

Rubber chingtu pakhat chuan taimak a ngai hle tih sawiin, “Zing khawvar tirh atanga ni chhuah thleng hi a hnai hun a ni a, hemi hun chhunga hnathawh hi a ngai a. Mizo zingah hnathawk tur hmuh a har hle a, hlawhfa lak lai tak hi a buaithlak lai a ni. Hnathawk tur hian vai emaw, hnam dang emaw lak an ngai thin a, helai tak hi kan harsatna lai chu a ni,” tiin ZALEN a hrilh.

Rubber chu kumtluan deuh thawin a hnai theih nia sawiin a tlangpuiin April atanga December inkar chu hnai hun lai ber niin a sawi bawk.

Tun dinhmuna rubber chingten harsatna an tawh lian ber chu a tihrona chungchang a ni tih sawiin rubber chingtute chuan, “Ni-a pho ringawt hi chu a buaithlak a, a tihro dan tur ang tak a ni lo bawk a. A tihrona ‘smoke house’ atanga tihro ngei hi a tha a, tunah hian hetiang khawl pahnih Mizoramah a rawn thleng ta hi a lawmawm kan ti tak zet a ni,” tiin a sawi a. Rubber hi hectare khatah kung 500 vel a phun theih a ni.

India ramah chuan Kerela leh Tripura te chu rubber thar chhuak tamte an ni.