Ruihhlo kan tih mai heroin (No.4) chu ram changkang leh hausa te tih turah ngaih a ni thin a, mahse Mizoramah pawh kum 1980 chho vel atangin kan hmelhriat ve tan a. Excise & Narcotics Department chuan kum 1984 atang khan mumal takin ruihhlo vanga thi (druga related death) an chhinchhiah tan a, kumin June ni 16 thleng khan ruihhlo vanga thi hi mi 1608 an chhinchhiah tawh a ni. Ruihhlo vanga thi zingah hian mipa tam zawkin 1418 an awm a, hmeichhia pawh 190 lai an awm bawk. March thla atanga inkharkhip kalpui anih hnuah ruihhlo vanga thihna hi a tlahniam nasa hle.

Excise & Narcotics Department thawktute chuan lockdown puan tantirh khan heroin rate (man) hi nasa takin a pung niin Zalen an hrilh a. Lockdown tantirh lai khan heroin hawng khat hi Rs. nuai khat te a kai nia sawiin a hnuah tlemin a rate tlain Rs. 80,000 te a ni a, tunhnaiah erawh Rs. 65,000 te pawhin hmuh tur a awm niin an sawi. Ruihhlo chu khawchhak lam atangin a rukin tlema zawng a rawn lut thin nia an hriat thu sawiin Bhaga lam atang pawhin nitin mamawh phur lirtheiah a rukin engemaw zat chu heroin (Bhaga cap) a rawn lut nia an hriat thu an sawi bawk.

Excise & Narcotics Department thawktute chuan tuna state dang atanga rawn lut bakah hian mi thenkhat chuan lockdown hmaa an khawl (stock) sa chu an hralh leh mek nia an hriat thu an sawi a. Damdawi ti thin te chuan an ruihna tur heroin an hmuh loh avangin Doctor ten an hrehawm chhawkna atana damdawi an chawh te an ei thin niin an sawi bawk. Hetih lai hian khawvel hmun thenkhata an buaipui ruihhlo chi khat meth chu Mizo thalai zingah buaipui an la awm lemlo nia an hriat thu an sawi bawk.

Ruihhlo ngai enkawlna hmuna thawk Doctor pakhat chuan damdawi ti thin ten ni danga ruihna atana an hman lar heroin an hmuh theih loh avangin an hmuh chhun pawh a man a to em avangin Doctor te rawnin an in 'detox' sup sup niin Zalen a hrilh a. Ruihhlo ber a awm loh avangin damdawi hmansual vanga thi pawh an tlem hle niin a sawi bawk.

Aizawl veng pakhata ruihhlo leh sualna dotu zinga mi chuan lockdown tantirh kha chuan drugs addict pawh an han duak tih sawiin tunhnaiah erawh chuan inhawrkhawm leh let let an awm tan niin a sawi a. Heng mite hian khawi atangin emaw damdawi hi hmuhna an nei nia a rin thu Zalen a hrilh bawk.

Mizoram State AIDS Control Society a thawk pakhat chuan tun dinhmunah damdawi hmuh tur a van avangin addict tam tak chuan an nghei phah niin a sawi a. Damdawi van chhan hi khawchhak lam atanga a lo luh loh vang a ni tih sawiin lockdown zawh hnuah damdawi hi a lo lut leh anih chuan nasa taka kan chhiatpui a rin thu a sawi a. "Damdawi ti thin te hian an tih loh vang vang hnua an tih leh thut hian an dose pangngai nia an hriat ang kha an zo tawh thin lova, drugs over dose an tam loh nan tun atanga kan theih ang anga lo fimkhur hi a ngai hle a ni," tiin Zalen a hrilh bawk.