Ruihho do kawnga hma latu lian ber, Excise & Narcotics Department-in ruihhlo phurhna atana lirthei an man zingah Light Motor Vehicle (LMV) an tam ber.

Excise & Narcotics Department-in an chhinchhiah danin ruihhlo phurhna atana lirthei an mante hi chi hrang hrang - two wheeler, three wheeler, LMV, MMV leh HMV te an ni a. Heng zingah hian LMV tam berin two wheeler-in an dawt a ni.

Ruihhlo phurhna atana lirthei an man zinga tam ber, LMV hi kum 2019-ah 110, 2020-ah 62, 2021-ah 57, 2022-ah 115, 2023-ah 131 leh February 15, 2024 thleng khan 10 an ni.

LMV dawta lirthei man tam ber two wheeler hi kum 2019-ah 80, 2020-ah 32, 2021-ah 31, 2022-ah 52, 2023-ah 118 leh February 15, 2024 thleng khan pakua te man an ni.

Three wheeler hi 2019-ah 12, 2020-ah pariat, 2021-ah 11, 2022-ah pakua, 2023-ah 15 leh 2024-ah pakhat te a ni a. MMV hi 2019, 2021 leh 2024-ah man an nei lo va, 2020-ah pathum, 2022-ah pakhat leh 2023-ah pakua a ni.

HMV hi 2019-ah paruk, 2020-ah panga, 2021-ah pali, 2022-ah pahnih, 2023-ah 10 leh kuminah pakhat te an ni.

Ruihhlo chi khat, methaphetamine pawh Excise & Narcotics Department hian an man tam hle a. Tun hnai kum nga kalta (2019-2023) chhung khan kg 418.457 an man a. Kumin February 15 thleng khan kg 23.220 an man tawh bawk.

Excise & Narcotics Department thawktute sawi danin methamphetamine hi Mizo thalaite zingah chuan ti an awm lo a, tuna an mante hi Middle East leh Europe lama kal tur te an ni a. Methamphetamine phurtu/tawlhtu zingah hian hnam dang an tam hle niin an sawi bawk. 

Methamphetamine hi kum zabi 20-na vel atanga hman tan niin ruihhlo ngaih (addict) awl tak a ni a, hriatna thazam a khawih avangin taksa tan a hlauhawm hle niin mi thiamte chuan an sawi.

Excise & Narcotics Department hian April 1, 2023 atanga February 15, 2024 thleng khan sawrkar sum bawmah Rs. 2,20,92,847 an chhung lut tawh a. An sum chhun luhte hi Foreign liqour & spirit-ah an target Rs. nuai 139 a nih laiin Rs. 1,76,50,497 an hmu a, Fines & confiscation-ah an target nuai 40 niin Rs. 40,00,450 an hmu a, thil dang (other receipt)-ah an target nuai 1 a nih laiin Rs. 4,41,900 an hmu a ni.