Faina lamah kan hnufual hle a, tunhma deuh chuan kawmthlang lama bawlhhlawh paih mai thin kan ni. Kan khawpui ber Aizawl ah pawh hun eng emaw chen chu kawr leh hmun remchangah te bawlhhlawh kan bun mai mai thin. Mahse tunhnaiah AMC hmalakna in motor hmangin bawlhhlawh khawn a ni a, hmun khata paihkhawm thin chu hmasawnna kal zelah tunah chuan bawlhhlawh pawh a tawih leh tawih thei lote thliarhran a niin sum lakluhna atan hman a ni ta hial mai. Aizawl Municipal Corporation (AMC) chuan Tuirial bulah bawlhhlawh sawngbawlna hmun thar Solid Waste Management Centre dinin felfai, changkang leh awmze nei zawkin bawlhhlawh te sawngbawl a ni ta.

Solid Waste Management Centre hi nikum kumtawp lam khan peih niin December 2019 atangin Aizawl khawpui veng thlanbik veng 19 ten an bawlhhlawh an paih tan a. Naktuk atangin veng 38 ten an paih tan leh ang a, hun remchang hmasa berah a bak veng 25 in an paih chhunzawm leh dawn a ni. Vawi khata veng zawng zawngin an paih nghal mai loh chhan hi tih dan thar, kalphung thar hmanga tawih thei leh tawih thei lo, plastic leh E-waste te thliarhran anih vang a ni.

AMC in ruahmanna a siam dan chuan tawih thei leh tawih theilo hi veng tinin an duh niah an paih thei a, Thawhlehni apiangin plastic lam chi hrang hrang te funin paih theih a ni a, thla thar Thawhlehni hmasa berah E-waste lam chi funin paih theih a ni bawk.

Solid Waste Management Centre ah hian tawih thei leh tawih theilo te chu a hranga paih a ni a. Tawih theilo te hi thliarhrang turin tun dinhmunah hlawhfa 11 rawih an ni a, tawih theilo zinga mi hi tlema zawng chu hralh an ni tawh. SWMC enkawltute chuan Plastic bottle ruak chu kg ah Rs. 4 hisapin an hralh a, thir lam chi chu kg ah Rs. 5 hisapin an hralh a, Litchi bottle ruak chu kg ah Rs. 30 in an hralh a, lehkha khawng chu kg ah Rs. 2 in an hralh a. Glass bottle ruak te, pheikhawk chhia te, thawmhnaw chhia leh bag chhia te chu lei duhtu an la hmuh loh avangin an khawl khawm zel phawt niin he hmun tlawhtu Zalen palai an hrilh.

Tawih thei chi hi a lo thlen veleh damdawi pawlh a ni a, ni 15 vel dah anih hnuah khawl chi hrang hrang hmangin thliar sin leh a ni a. Leitha siam tur hian ni 45 atanga 60 inkar vel a ngai a, tun dinhmunah chuan a sawngbawlna khawl hi hna thawk tan chauh anih avangin leitha hralh tur a la siamchhuak hrih lo a ni.

SWMC ah hian changpat hmanga leitha siamna tur (vermi compost) pawh building 4 ah engemawzat siam a ni a. Changpat hmanga leitha siamna khurah hian hnim tawih karah bawng-ek 20% hman tel zel a ngai dawn a ni.

SWMC-a bawlhhlawh paih te hi tawih thei te sawngbawlin, hralh suma chang thei te chu hralh an ni dawn a. Hemi bak hi chu a paihna hmun tur bika lei laihkhuar Sanitary Land Fill ah paih tur a ni. Tawihthei paihna tur lirtheiah tawih thei lo a tel a nih chuan a hmuna lo dawngsawngtu contractor-te hian paih remti lovin an let tir zel dawn a. Tuna Tuirial-a bawlhhlawh paihna hmun hlui zawk chu khar a nih hunah phei chuan thu zawm tha lote tan chuan bawlhlawh paihna tur zawn a harsat phah theih thu leh, bawlhhlawh thliar ngei ngei chu tihmakmawh a nih tur thu an sawi bawk.

Solid Waste Management Centre satu Contractor hian kum 2 chhung chu enkawl zui dawn a ni.