Mizo lo neih danah ngaihdan a inang lo a, tlangram lo neih hi tunlai khawvelah chuan thil tih chi pawh a ni tawh lo a, lo hmun nghet neih hi thil tul tak a ni bawk. Chutih rualin Mizo lo neih dan phunga lo neih erawh hi chu kan thinlungah hian ngaihhlutna chin a awm lo thei lo a, a culture ang zawng phei chuan hlu tak a ni.

Aizawl Venglai pa, N. Lungpher khaw chhuak Lalchungnunga chuan an khaw ram chhunga Mualpeng ramah kumin hian lo tin 13 hmun zet a valh a, hei hi hriat theih chinah kuminah Mizoram chhunga buh chinna atana ram valh zau ber a ni. Ani hian he lo hi hlawkna uma nei a ni hranpa lo a, mi dang a puih theihna remchang a nih piah lamah Mizo nunphunga thil pawimawh ber ni thin ‘Lo neih ngaihhlut a, thalaite chona’ a nih thu a sawi.

Tin 13 zet mai Lo a nei a, hei hi chhungkaw rual tan pawh enkawl huphurhawm a ni a, chutihrual chuan he lo neitupa ber Lalchungnunga hi hrisel lohna avanga kal pawh harsat a ni a, hlawhfa chhawrna atan pawh a insengso nasa hle ang tih a hriat theih. Hlawhfa tur hmuh pawh thil awlai tak a ni dawn lo a, mahse, Lalchungnunga tan erawh tu pawh hlawhfa atan an tling vek avangin atan harsatna a awm lo. 'Khawtlangin chhawr en a an en poh pawh a chhawr duh vek,' niin a Lo zawh ni a kal thenkhat te chuan an sawi. Lalchungnunga erawh chuan, “Ka hnenah inhlawhna tur min rawn dil a, min rawn dil apiang hi chu ka chhawr mai. Ka hnena an awm chhung hian an fel lohna pawh ka hmu lo, taima tak hian hna hi an thawk vek a ni,” a ti.

Lo a neih atanga hlawkna a neih a beisei leh beisei loh chungchanga a sawinaah Lalchungnunga chuan, “Ka pawisa hmanna atangin kan chhut anga a la hriat mai ang chu. Ka hek anih pawhin tam taka hekna a ni lo ang,” tiin, “Hlawkna uma ti ka ni lo a, mi dang ka puih ve theihna a ni a, chubakah Mizo Lo nun phung chhawmnun zel hi a tul ka ti a ni,” a ti. Lo neih chu la chhunzawm zel a tum thu a sawi tel a, amah lawmpuitu leh duhsaktu te avanga ringawt pawhin Lo neih hi chhunzawm chakawm a tih thu a sawi bawk. He Lo hi tum 5 ngawt thlawhchhuah a ni a, a neitu pa ber hian a riahchilh tawp a ni ber. Tuna Lo an neihna Mualpeng ram hi nakumah hian N. Lungpher hian lo neihna atana an theh tur a ni a, a bul tan nan Lalchungnunga hi kumin atan helai ram hi an lo neih hmasak tir a ni.

Lalchungnunga hian Lo neih hi thil hahdam tak a ni lo tih a sawi a, Aizawl-a pianga seilian tam tak chuan a hautak zia pawh an hre pha lo hial niin a ngai a, Mizote tun dinhmun thleng tura kan pi leh puten kumtluana hna an lo thawh dan thangtharte hriattir chu pawimawh a tih thu a sawi a, hlawkna um lovin, kan pi leh puten dam khawchhuahna atana an thawh ber Lo neih kalphung thangtharte hriattir chu tul niin a hria a, sawrkar hnathawk leh thawk lo pawh, hetiang zawnga mi dang te zirtir tura penchhuak turin a duh a ni. “Kan fate/tute hian lo vah, hal, mangkhawh, hlo thlawh, buh seng, chil leh ram riah ang chi te leh a dangte hi a takin temtir ve ila, hei hian tumruhna nasa tak pawh a siamsak ngei ka ring tlat a ni,” Lalchungnunga chuan a ti.

Lalchungnunga hi sawrkar hnathawk pension a ni a, sawrkar hna a thawh lai pawhin hna sang thawk a ni hran lo, thing-tlanga piang leh sei lian a nih angin Lo neih hi a ngai pawimawh hle. Aizawl lama a hna avanga a awm hnu pawhin Lo neih hi a tih dan phung a ni a, neih loh kumte chu nei thin bawk mah se, a bansan tak tak thei chuang lo a, tuna a Lo neihna pawh hi a ram ni lovin a thianpa Thathanga, N. Lungpher ram a neih hawh a ni a, tih tak zeta Lo nei thin anih avangin a duh chen chen hman a phalsak a, VC lamin ram an hmantir bawk.