Manipur-a tlangmite leh Meitei inkara buaina kal zelah raltlan mi thahnem takin Mizoram an rawn pan zel a, buaina hi a la reh mai dawn lo nia a lan avangin mi engzat nge rawn luh belh dawn tih hriat a ni lo.

Raltlan tam tak hian pan tur bik hre lem lovin Mizoram an rawn lut tawp mai a, heng mi baihvaiten an awmna tur an pan hmaa an lo chawlh lailawkna atan hian Central YMA chuan an office-ah lo chawlh lailawkna tur ‘transit camp’ an siam a, hei hi raltlanten an chhawr tangkai hle.

ZALEN-in Central YMA Office-a transit camp a tlawh lai hian raltlan mi 20 chuang an awm mek a, heng mite hi hmeichhia leh naupang an ni tlangpui.

Transit camp-a raltlante lo dawngsawng tur hian CEC member-te chu a inchhawkin an duty a, heng duty-te hian raltlan lo thleng tharte chu lo dawngsawngin a tul angin hmun dangah an sem darh leh thin a ni.

Transit camp-a duty CEC member pakhat chuan, “Raltlante hi a tlangpuiin nunau an ni ber a, mipa awmte chu fa sen nei leh harsatna bik neite an ni a. Mipa puitling chu lo chhuk mah se an khua venhim a ngaih avangin an chho leh thuai thin a ni,” a ti a. Raltlan zingah Sugnu khua leh Lamka an tam deuh ber tih a sawi bawk.

Raltlante hian Mizoram pan nan hian a rem ang anga pawisa thawhkhawmin Mizoram an rawn pan thin a ni.

YMA duty-te chuan raltlante chu a tlangpuiin an in leh lo hal vanga lo chhuk an ni tih sawiin, “Bungrua leh thawmhnaw, mutbu te nei lovin an hak lai nen te an lokal a, a remchan ang angin CEC-ten kan neih ang ang kan khaikhawm a. Hei bakah hian mi tlawmngaiten an pe khawm bawk a; chuvangin, tun dinhmunah chuan kan ziaawm a. Mikhual 40 vel chu thleng theiah kan inngai a ni,” an ti bawk.

Central YMA-in transit camp a siamah hian raltlante chu tlulutin heta tang hian branch thenkhat chuan an hall-a enkawl chhunzawm turin an la leh a. Hetah hian sawrkarin raltlante awmna tur hmun a siam fel hma chu enkawl an ni dawn a ni.

Raltlan thenkhat an chhungte bela khawsa an awm laiin thenkhat chu phai lama inhlawh tura kaltlang an awm bawk.