Sairep khua chuan tuihna an humhalh leh dahkhawl that avangin tui an hnianghnar hle a, an hnathawh that vang hian Water Warrior Award an dawng.

March 4, 2023 (Inrinni) khan sawrkar laipui, Department of Drinking Water, Ministry of Jal Shakti buatsaihin Vigyan Bhawan, New Delhi-ah Swachh Sujal Shakti Samman (SSSS 2023) hun hman a ni a. He hun hi India rama hmeichhiate zinga faina, tuihna humhalh leh water supply system enkawlnaa thawk thate chawimawina atana buatsaih niin, India ram pum atangin Water Warrior Award mi paruk hnenah hlan an ni.

Mizoram atangin HS Lalawmpuii, Sairep VCP chuan India President Droupati Murmu-i hnen atangin he chawimawina hi a dawng a ni.

ZALEN-in a biaknaah Sairep VCP, HS Lalawmpuii @Awpi chuan an khua chuan tui duh tawka hman tur an nei niin a sawi.

Awpi sawi danin gravity hmanga tui an lak thin chu a hnianghnar tawk lovin thalah duhkhawp hman tur an nei lo a. Tuikhura tui chu khawl hmanga pump chhovin tanky-ah an dah leh a, chuta atang chuan in tinah connection pe in tui hnianghnar takin an sem thei ta niin a sawi.

Sairep VCP chuan, “JJM puihnain in tinah connection kan pe a, Gram Sabha remtihnain tui hi litre khat Rs. 3 hisapin chhungkaw tin hnenah kan pe a. A dahna nei tha deuhin an la tam mai a, a dahna nei tlem deuh chuan an mamawh tawk an la mai thin a. Tui lak man atanga kan sum hmuhte hi tui semtu leh tui pump buaipuitute hlawh atan kan hmang leh thin a ni,” a ti a. Tui chu kar khatah vawi hnih an sem thin niin a sawi bawk.

Faina kawngah pawh nasa takin khawtlang chuan hma an la nia sawi bawkin VCP HS Lalawmpuii chuan khawtlang huap ang te, YMA leh YMA Chhang te pawhin faina hnatlang an nei thin niin a sawi a. Hei vang hian an hrisel phah nia a hriat thu sawi bawkin mitthi neih loh kumte pawh an nei hial niin a sawi bawk.

Sairep khua hi Lunglei district-a awm niin in 60 vel an ni a. Job card nei hi chhungkaw 64 an awm mek nia thudawn a ni.