Aizawl : AH&Vety thawktute chuan tun hnaia Mizoram hmun thenkhata vawk an thih chhan chu Porcine reproductive and respiratory syndrome (PRRS) natna vang nia an hriat thu an sawi.

Zalen-in AH &Vety thawktute hnen atanga thu a dawn danin tun hnaia vawk thenkhat thi sample chu College of Veterinery Sciences (CAU), Selesih ah enfiah a nih hnuah Porcine reproductive & respiratory syndrome (PRRS) natna a ni tih an finfiah niin an sawi a. PRRS chu kum 2013, 2016 leh 2018-ah te Mizoramah lengin vawk tam tak an thi a, PRRS hian Mizoram chu a la chamchilh reng nia sawiin a hma anga vawk thi puk puk ang kha awm lo mah se a khât tawkin vawk thenkhat chuan an la thihpui reng niin an sawi a. Vawk vulhtute pawh an fimkhur avangin tunhma ai chuan a hri leng pawh a ziaawm niin an sawi bawk.

AH & Vety department thawktute chuan PRRS vaccine chu siam a ni tawh tih sawiin vawk ah pawh a theih ang angin enchhin a ni tawh niin an sawi a. “Tunah hian field trial hi kan hmabak mek a; mahse, lockdown avangin thiltih a harsa a. Mizoram pawh field trial neihna atan hian thlan kan ni a, tluang taka neih theih a nih a, vaccine hi pek that anih chuan vawk thihna pawh a tlem phah dawn a ni,” an ti a. PRRS chu in leh a vela vawk vulh ah inkai a awlsam bik niin an sawi bawk.

Tun hnaia vawk natna hlauhawm tak African Swine Fever chu Assam ah leng mahse Mizoram a la rawn lut lo nia an hriat thu AH & Vety department thawktute chuan an sawi bawk a. ASF chu a hlauhawm tih sawiin, “Vaccine a la awm loh avangin kan rama a lo luh hi a hlauhawm hle a. Vawk dam lai mai bakah a rep leh frozen pawh a hlauhawm hle a. Frozen ah hian ASF natna hi thla 3 atanga thla 6-te a dam thei a, a lo luh palh chuan nasa takin kan tuar thei a; chuvangin, mi tin kan fimkhur a ngai hle a ni,” an ti a. State ramrite uluk taka ven a nih avangin African Swine Fever chu Mizoramah a la lut lo nia an ngaih thu an sawi bawk.