Kuminah chuan hripui leng vangin kum danga Mas tinuamtu, veng chei chu tih theih a ni dawn lo.

Veng chei endik leh lawmman siamsaktu Tourism department chuan kuminah hian kum danga an tih thin veng cheimawi lawmman an pek thin chu tih an tum lo nia hriat a ni a. Zalen-in Tourism department thawktute hnen atanga thu a dawn danin, “Covid 19 hri leng hian ram puma tibuai a, chuvangin tun dinhmunah chuan veng chei lawmman kan sem thin kha tih tumna kan nei hrih lo a ni,” an ti. Tourism department hian Krismas leh Kumthar puala veng chei te chu Young Mizo Association leh Mizoram Journalists' Association te phungbawmah sawmin an endik thin a, veng chei mawi te hi lawmman an hlan thin a ni.

Nikum 2019 a veng cheimawi ber lawmman latu Chaltlang YMA President Lalhruaitluanga chuan kumin hian chei an tum lem lo niin a sawi a. "Kum danga kan tih thin ang kha chu kumin hi chuan tih a har dawn riau mai a. Eng emaw a kawtthler lunlai deuh hi chu kan chei leh mai thei a, a bak hi chu kan tih theih pawh a ka beisei lo khawp mai," a ti a. Kum 2018 a lawmman pakhatna dawngtu Ramhlun South YMA hruaitute pawhin veng chei chungchang chu an la ngaihtuah lo tih sawiin an chei a rin loh thu a sawi bawk.

Aizawl veng pakhata welfare hruaitu pawhin kum engemaw zat chu an welfare huam chhung chu a theih ang angin an chei tawh thin a, mahse kuminah erawh chuan sum harsatna avang leh kum dang anga hnatlanga chhuahkhawm a remchan loh avangin chei an tum lo niin a sawi a. “Kan welfare huam chhung kan chei hian kan thawhhona a that phah avang leh kan inpawhna avangin chei leh ngei kan duh a; mahse kum dang anga han tih a rem si lo a. Chuvangin kan welfare huamchhung chinah hian Krismas leh Kumthar chibai bukna siam kan tum ta ringawt mai a ni,” a ti a. Kumin an chei thei lo tur chu hrehawm a tih thu sawiin a nuam ti leh hlimpui ber thin naupang an hawihai hle dawn niin a sawi bawk.