Tualchhung tanrualna avangin tualchhunga mite’n a zar an zo a, Zotlang khawtlang te Krismas leh Kumthar vuatveta an chet dan a danglam piah lamah mi dang tan pawh entawntlak an tling.

Thalai tam takin tih tur awm lo an chhuanlam a, len kualna tur pawh a awm lo tih te chu an phunna a ni. Zotlang khawtlang erawhin an thalai te hunawl hnawh khatna tha an siamsak a, an veng thalai te theihna leh thiamna te an phawrh chhuah sak a, thil zawng chhang tlak tak ni pawhin an hria.

Zotlang YMA te hian an veng thalai te Krismas leh kumthar vuatveta an him theihna atan leh inawm tleina an neih theihna turin carnival an buatsaih a, he huna inhnangfakna tur buatsaihtu atan tu dang mah hmang lovin an veng chhung mi thiamna nei te an ni a, sum tuakna tha tak a ni zui ta bawk.

He hmunah hian karoake, hit the can, face paint, nghakuai chiah bakah intihlimna hmun hrangah a awm a, veng chhung intihhlim na'n an hmang a ni ber mai. Anni hian an tualchhung mi te tana kawng hawn chu an tum pakhat a ni. Face paint ah te hian professional te hmang lovin an vengchhung mi te thenkhat youtube atanga inzir chawp te'n an ti ve mai a, local talent an haichhuak a ni. Chutiang in ei leh in lamah pawh. Carnival awmna bulah ei leh in lam buaipuitu lam hi an thu nual a, an veng chhunga ei siam mi te bawk an tih tir a, tandoori, sa hrang hrang, eitur hrang hrang an siam pawh dawr lam ai maha tui zawk te a ni fur.

A hlawhtlin em avangin Krismas bawr chauha tih tum khan New Year ruaitheh tlaiah an chhunzawm leh a, veng chhung mai bakah veng dang atang pawhin chhimtu an thahnem hle.

He hunah hian intih hlimna hrang hrang an buatsaih zingah hian veng dang atangin naupang infiamna lam buaipui tur mi dang an sawm lut ve thung a, naupang awm tleina hmun siamin naupang lut te'n pawisa an chawi a, YMA lamin an inkulh man zan tin an chawi ve thung. Thalaite nuam tih tur 'House of Horror' buatsaih sak turin Mizo Dance Camp te chu an sawm lut bawk a, anni hian an sum hmuh atangin Zotlang Branch YMA hnenah hian zantin an chhunglut. Ei leh in siam ho pawh hi thut hman an chawi tir a.

An veng chhung mite talent haichhuah piah lamah, an thalai ten veng chhung an chhuahsan tam lohna hi entawn tlak a ni khawp e.