Tun hnaiah Mizoram hmun hrang hrangah zu leh a kaihhnawih vanga thi an thahnem hle nia hriat a ni a, zu phalrai (zawrh lai) leh zawrh hnuah pawh zu vanga thi hi an kiam lemlo niin ZALEN chuan thu a dawng.

Aizawla private hospital pakhata doctor chuan an damdawi ina thi zinga a zatve aia tam chu zu kaihhnawih vanga thi an ni tih ZALEN a hrilh a. “Kan hospital a damlo thi zinga a chanve aia tam mah hi zu kaihhnawiha thi an ni a. Heti taka zu thihpui an tam chhan hi zu quality tha lo an in hnem vang niin kan ngai deuh ber a ni,” a ti.

Doctor chuan zu hian pumpui, thin, kal, thluak leh taksa peng pawimawh laite a khawih thin nia sawiin heng natna vanga thi hi an thahnem hle tih a sawi a, “Zu quality tha pangngaiah chuan in regular deuh pawh kum 10 tal chu dam tura ngaih an nih laiin Mizote zu in tam ber, Aizawl khaw daia siam thin hi a quality a tha lo niin a lang a, in regular deuh phei chu kum nga bak an daih meuh lo niin ka hria,” a ti bawk.

Excise & Narcotics department-a officer pakhat pawhin zu kaihhnawiha thi an tam tih sawi bawkin, “Zu chhia kan tih kha chu ni em lo mah se tun hnaiah hian pumna leh thil dang avanga thi hi an tam hle a, hengho hi zu kaihhnawih an ni tlangpui a ni,” a ti.

Aizawl khawpui daifema zu chu a thianghlim lo tih sawi bawkin, “Tun hmaa dawidim (chawl) hmanga buh um ang kha a ni tawh lo a, instant yeast hmangin zan khat lekah thlawr theih turin an peih mai a. Yeast hi a chak em avangin taksa hian a tuar niin kan hria a, heng zu hi an thlawr zawhah chini pawlhin an thlawr lehnghal a, mihring hriselnain a tuar hma hle niin kan hria a ni,” a ti. 

Excise officer chuan zu phalrai leh khap a nih hnuah pawh zu in chu an la pangngai reng nia a hriat thu sawi bawkin Mizoten zu in kan thiam lo chu kan chhiatpui hma bik nia a hriat thu a sawi.

“Tribal zingah pawh Mizote hi zu in thiam lo ber kan ni mai awm mang e aw ka ti a, Mizote tluka zu chhiatpui hi an awm pawhin ka hre lo a ni,” a ti bawk.

Pa pakhat pawhin Aizawl khawpui daia zu thlawr thin chu tlanchhe zu a nih avangin in loh a him ber tih a sawi a. “Mizote hi zu in kan thiam lo hlein ka hria a, zu kan in a nih pawhin kan taksa tichhe lutuk lo tura a ‘seh hmeh’ ei tel hi kan ching lo hle a. A hmeh ho tê pawhin sunhlu, sawhthing leh chana ro tih vel mai mai kan hmeh a, hei vang hian kan chhiatpui hma bik niin ka hria,” a ti ve bawk.