Aizawl January 27, 2023: Aizawl Day vawi 133-na lawmna tura Organising Commmittee te chuan nimin khan chanchinthar lakhawmtute an hmachhawn a, Aizawl Day hman tum a nih dan leh January 21 atanga he Day pual hi hman tan tur niin a lawmna pui ber chu January 25, 2023-ah AR Lammula-ah hman tura ruahman a ni.

Mizoram khawpui Aizawl hi Mizoram sorkarin official-a a pawm ang chuan kum February 25, 1890-a din a ni. Hemi ni hi Assam Police Officer Dally-a leh a ho mi 400 lo thleng ten Aizawl Fort an din ni a ni. 1990 kumah khan Mizoram Sawrkar huaihawtin Centenary lawm a ni. Aizawl Mihlun Thlahte chuan kum 2020 atang khan he ni hi 'Aizawl Day' ti a vuahin an hmang chhunzawm leh a. Nikum March ni 11-a Board of Councillor Meeting chuan he ni hi AMC ni pawimawh (highlight day) ah a puang a. Aizawl Day hi kum tin, kumin atanga hman ziah tawh turin ruahmanna an siam a ni.

Aizawl Day vawi 133 atan hian Budget ah cheng nuai 50 dahin; a thlavenga dah nen avaiin cheng nuai 60 ruahman a ni a. Sub-committee peng hrang hrang an siam a, chungte chu - Football Tournament Sub Committee, Cleanliness Competition Sub Committee, Information & Publicity Sub Committee, Band Contest Sub Committee, Carnival Sub Committee, Cultural Sub Committee, Stall & Exhibition Sub Committee, Souvenir & Conclave Sub Committee te an ni a. Sub committee member theuh te inruatin an inbuatsaih mek a ni.

Aizawl Day pual hian Football Tournament chu AMC leh Aizawl District Football Association te tangdunin an buatsaih dawn a. AMC hnuaia Ward 19 te chu an tel thei vek dawn a ni. Football match hi February ni 8 atanga ni 24 chhungin Rajiv Gandhi Stadium, Mualpui ah khelh thin a ni ang.

Conclave & Souvenir Sub Committee hmalakna February 23 Aizawl Day Conclave hi tum a ni a. Aizawl Chanchin, a lo indin chhoh dan zirhona neih a ni dawn a. Conclave hi Aijal Club-a R.B McCabe Hall ah neih tum a ni. Aizawl chhunga tlawmngai pawl - Aizawl Mihlun Thlahte, Central YMA, MHIP, MUP, MZU leh MSU te leh Chanchinbumite, College leh University-a History & Ethnography department zirlaite nen Aizawl indin chhoh dan hi sawiho tura ruahmanna siam a ni. Aizawl Day pual hian Souvenir phek 200-a chhah tihchhuah an tum.

Stall & Exhibition Sub Committee hmalakna-in February ni 23 atanga ni 25 chhung hian Aizawl Sipai Lammual ah Stall 77 hawn an tum a. Hengte hi thlan fel vek tawh niin; chung zinga stall 27 chu ei leh in lam a ni dawn a. Indian, Chinese, Korean, Japanese, Thai, Continental leh Mizo traditional food leh northeast food thlenga chhawpchhuah an tum.

Photo Exhibition kalpui turah hmanlai thlalak atanga tunlai thlalak phochhuah a ni dawn a. Thlalak hlui thenkhat te hi social media ah emaw la hmuh ngai loh, thulkhung phawrhchhuah tur a ni.

February 25-ah Costume Parade neih a ni dawn a bultum tur hian Republic Veng Branch YMA te ruat an ni. Anni hian hmanlai Aizawl atanga vawiin Aizawl kawng hrang hranga hmasawnna thleng leh incheina chena a danglam chhoh dan entir an tum.

Band Contest Sub Committee ten rimawi lam an hrut dawn a. Aizawl Day ni takah, Aizawl Sipai Lammualah Band Contest hi neih tura ruahman a ni. Lawmman 1-na chuan ₹1,00,000/- a dawng dawn a, 2-na in ₹70,000/- leh 3-na in ₹50,000/- an dawng dawn a ni. Consolation prize atan band group 2 tan ₹10,000/- an dawng ang. 

Cleanliness Competition Sub Committee din a ni bawk a. Anni hian Aizawl Day pualin veng fai an endik dawn a. February ni 8 atanga ni 16 chhung hian AMC area chhung faina endik hna hi Aizawl City Local Council hruaituten an bultum ang. 1-na in ₹50,000/- a keng ang a, 2-na leh 3-na in ₹30,000/- leh ₹20,000/- a keng ang. Consolation prize veng 5 thlanchhuah hnenah ₹5,000/- theuh hlan an ni ang. 

Carnival leh Cosplay sub committee te hmalakna han sawi leh ila. Anni hian Aizawl Day Lammual a lawm chhung zawng Cosplay show an buatsaih dawn a. Cosplay ti tur hian LAUGH TALE biakfel an ni tawh, face painting hi tih tum a ni bawk. Carnival buatsaih tum a ni a, Carnival ah hian naupang atanga puitling lawm tur tinfiamna chhawpchhuah an tum.